ZGJEDHJE TË RREGULLTA QË MBAHEN NË RRETHANA TË Ç’RREGULLTA…
Zgjedhjet e rregullta lokale dhe ato parlamentare, të cilat kreu i shtetit i ka caktuar për 21 qershor të këtij viti, pastaj Pandemia globale, në të cilën gjendet rruzulli tokësor e në theks të veçantë Lugina e Preshevës, situata politike në Luginë, mundësia e përfaqësimit me më shumë deputetë në parlamentin serb, si dhe zgjedhjet lokale në komunën e Bujanocit, të cilat zhvillohen krahas atyre parlamentare, ishin shkaqet që zhvilluam një intervistë me kryetarin aktual të komunës së Bujanocit dhe kandidatin e PVD-së për deputet popullor, z. Shaip Kamberin.
Edhe pse kryetari tani është tepër i zënë si me punët e përditshme politike në drejtimin e komunës dhe në këtë periudhë të përgatitjes sa më të mirë të subjektit të tij politik për zgedhje lokale dhe të listës së përbashkët për zgjedhje parlamentari, (ai) pa ngurrim iu përgjigj ftesës sonë për intervistë…
Nacionali: Kohë më parë kreu i shtetit serb i shpalli zgjedhjet lokale dhe parlamentare më 21 qershor, na thuani a është dashur të shtyhen edhe për një kohë për shkak të Pandemisë apo është vendim i drejt i presidentit?
Shaip Kamberi: Është parim kushtetues se mandati i dalë nga zgjedhjet zgjatë maksimum katër vite. Prandaj, ky është një parim, respektimi i të cilit është i domosdoshëm në sistemet pluraliste demokratike. Megjithatë, rrethanat e jashtëzakonshme (lufta, epidemitë apo Pandemia si në këtë rast) imponojnë përjashtimin e rregullit, sepse shëndeti i popullsisë është më prioritarë në këtë rast. Vetë shpallja e gjendjes së jashtëzakonshme më 15 mars dhe shtyerja e zgjedhjeve të prillit që erdhi si pasojë e gjendjes së jashtëzakonshme, kishin për qëllim luftën preventive kundër virusit dhe për ruajtjen e shëndetit të popullsisë. Realisht për dy muaj është bërë një kampanjë e ashpër, me orë policore, në të cilën nga popullsisa është kërkuar repsektim maksimal i tyre. Tash përnjëherë, sikurse është eliminuar çdo rrezik, merret vendimi për të shkuar në zgjedhje. Nuk mund të them që është vetëm vendim politik, sepse edhe profesioni (mjekët) u pajtuan që vala kryesore e virusit është zbehur dhe se mund t’i kthehemi jetës normale. Kthimi në normalitet nënkupton së pari respektimin e rregullave kushtetuese, që d.m.th., mbajtjen e zgjedhjeve të cilat, shpresoj, të kalojnë pa pasoja të mëdha për shëndetin e njerëzve. E vetë zgjedhjet, pavarësisht kthimit gradual në normalitet, nuk po mbahen në rrethana normale. Vetë kufizimi i tubimeve me vetëm 50 vetë, nuk lejon një fushatë klasike, të cilën në vazhdimsi e kemi patur. Kjo ndoshta nuk do të japë mundësi maksimale të ofrohemi me qytetarin, t’i sqarojmë idetë dhe programet, t’i marrim mesazhet e tyre. Por, kushtet përcaktohen nga lart. Dhe neve na mbetet që në kuadër të këtyre kushteve të angazhohemi për synimet tona.
Nacionali: PVD-ja në Bujanoc garon edhe për zgjedhje lokale dhe parlamentare, na thuani sa jeni të përgatitur për këto zgjedhje?
Shaip Kamberi: E thashë më sipër se rrethanat nuk janë normale. Në të dyja palë zgjedhjet ne duhet të jemi kreativ dhe të gjejmë metodat kreative për t’u ofruar te qytetari, për t’i shpjeguar idetë dhe synimet. Pra janë zgjedhje të rregullta që do të mbahen në rrethana të ç’rregullta.
Naconali: Po flitet se shumë shqiptarë në Bujanoc janë fshirë nga vendqëndrimet, nëse është e vërtetë sa e dëmton kjo PVD-në dhe subjektet tjera shqiptare në Bujanoc?
Shaip Kamberi: Ky fenomen është drastik, në Buajnoc, nuk ka përmasa alarmante, ka raste, por akoma janë raste në kuadër të lëvizjeve të rregullta të njerëzve. Janë pak raste të cilat në ditët ne vijim do t’ i prezantojmë, por, asgjë alarmante.
Nacionali: Tanimë lista për deputet e listës së shqiptarëve të bashkuar është publike, na thuani derisa deputetë mund t’i fitojnë shqiptarët në këto zgjedhje?
Shaip Kamberi: Rezulati jonë në këto zgjedhje parlamentare varet shumë nga serioziteti me të cilin subjektet pjesëmarrëse do t’i qasen procesit zgjedhor. Synimi jonë fillestar ishte që të kemi 3 deputet, por, rrjedhat e mëvonshme, të cilat dëshmuan se disa subjekte, me vetë kandidimin e kandidatëve periferik, pa ndonjë bagazh politik, nuk po dëshmojnë qasje serioze ndaj këtij procesi. PVD, në garë po paraqitet me kryetarin e vet që dëshmon seriozitetin më të lartë ndaj një procesi të përbashkët.
Nacionali: Në Preshevë votohet vetëm për zgjedhje parlamentare dhe jo lokale, si e shihni situatën politike në komunën e Preshevës?
Shaip Kamberi: Po, në Buajnoc mund të pritet ndonjë dalje më e madhe, por, dalja në Preshevë do të varet nga qasja serioze e subjekteve në këtë proces.
Nacionali: Porosia e juaj të gjithë simptaizantëve të partisë suaj dhe të shqiptarëve të Luginës së Preshevës për zgjedhet e 21 qershorit?
Shaip Kamberi: Pavarësisht rrethanave të çrregullta, në të cilat do të zhvillohen zgjedhjet, PVD, pret rezultat maksimal sikurse në zgjedhjet lokale në Buajnoc ashtu edhe në ato parlamentare në Luginë. Ne jemi të përgatitur për qasje ndryshe në këtë proces duke përdorur metodat të reja të komunikimit me zgjedhësit tanë. Ne kemi kandiduar në listat tona njerëz kompetent, që do t’i dalin zot zotimeve dhe synimeve që i ka PVD.
/Nacionali/
No Comment