TË NDIHMOHET KULTURA NË MEDVEGJË…
Nacionali: Kur u thmelua Grupi Folklorik “Shpëtimi” në Medvegjë?
Rexhep Abazi : Në vitin 2001, me nismën dhe angazhimin tim me një grup intelektualësh në Medvegjë u themelua OJQ e parë dhe e vetme e shqiptarëve të kësaj komune, “Shpëtimi”, aktiviteti i së cilës u zhvillua me finansimin tim, e cila ngriti shumë çështje të popullit shqiptarë në Medvegjë.
Po kështu me nismën dhe angazhimin tim, në vitin 2001, si organ i OJQ-s “Shpëtimi” Medvegjë, u themelua Grupi folklorik “Shpëtimi” Medvegjë.
Themelues të këtij grupi ishin:
- Prof. Rexhep Abazi, nga Sfirca,
- Z. Kadri Abazi (tani i ndjerë), nga Sfirca dhe
- Z. Shaip Berisha (tani i ndjerë), muhaxher nga Stublla e Medvegjës.
Nacionali: Sa anëtar i ka ky grup folklorik?
Rexhep Abazi: Në kushte të vështira, por me një vullnet të madh të këtyre tre entuziastëve dhe themeluesëve si edhe të anëtarëve të tjerë, të rregullt nuk ka patur kushte të jenë më shumë se pesë, ky grup filloi pjesmarrjen në aktivitetet kulturore të organizuara në Kosovë, por edhe në vende të tjera. Për herë të parë, jashtë Medvegjës, mori pjesë në Takimet e vendlindjes në fshatin Tyxhec, pastaj, Lisockë, Desivojcë etj., komuna e Kamenicës, tani Dardanës, në vitin 2002 e tutje, ku u mirëprit me respekt të veçantë. Nga këtu, ky grup filloi të jetë aktiv dhe të merr pjesë në aktivitete të tjera kulturore, kryesisht në Kosovë, në vendet e tjera të Ballkanit perëndimor e vendet tjera të Evropës dhe të Azisë.
Nacionali: Na i numëro aktivitetet e këtij grupi?
Rexhep Abazi: Pjesmarrja e grupit fillon të jetë më serioze në aktivitetin e Shoqatës kulturore Malësi e Madhe “Martin Dreshaj” të Pejës nga viti 2004 e më tutje në vazhdimësi.
Në vitin 2005, grupit , i bashkangjiten e dhe anëtarët: Z. Shefki Halimi, nga Tupalla,Zenel Halimi, nga Sfirca e Sabit Uka, nga Gërbaci dhe tani e tutje Grupi folklorik “Shpëtimi” Medvegjë, dhe në kohën më të gjatë veproi në këtë përbërje:
- Prof. Rexhep Abazi, nga Sfirca, udhëheqës;
- Z. Kadri Abazi, nga Sfirca, anëtar;
- Z. Shefki Halimi, bga Tupalla, anëtar;
- Z. Zenel Halimi, nga Sfirca, anëtar;
- Z.Sabit Uka, nga Gërbaci, anëtar.
Xhemajl Berisha, nga Gjilani, anëtar nderi, i palodhur, është njeriu i cili i dha ndihmë të madhe profesionale dhe mori pjesë edhe në shumë aktivitete të tij.
Në shumë aktivitete e paraqitje të grupit morën pjesë edhe: Zog Aliu( i ndjerë) nga Tupalla, Qazim Beha, nga Sfirca, Hajrije Abazi, nga Sfirca, Edona Abazi, Elsa Abazi, Uka, si pjesmarrës-se në aktivitete të caktuara, por Grupi asnjëherë nuk pati mundësi të ketë më shumë se 5 anëtarë të rregullt, për shkak të harxhimeve.
Në vitin 2005 grupi merr pjesë në festivalin folklorik “ I këndojmë lirisë”, në komunën e Klinës.
Në vitin 2006, Grupi folklorik merr pjesë në festivalin mbarëkombëtar folklorik “ Sofra Dardane” në Bajram Curr, festival ky i cili tubon pjesmarrës nga të gjitha pjesët e trojeve shqiptare.
Po në këtë vit, 2006, grupi “Shpëtimi” merr pjesë në festivalin folklorik “Kënga dhe vallja Çame” në Sarandë, duke përfaqësuar me sukses dhe dinjitet kulturën dhe këngën folklorike të shqiptarëve të Medvegjës e Kosovës Lindore.
Në vitin 2010, Grupi folklorik “ Shpëtimi” merr pjesë në manifestimin qendror të shqiptarëve të Turqisë, kushtuar dy vjetorit të Pavarësisë së Kosovës.
Në vitin 2012, më 28 nëntor, në manifestimin qendror kushtuar 100 vjetorit të shpalljes së Pavarësisë së Shqipërisë, ky grup me programin e tij ishte i treti nga 25 pesë grupe e shoqëri kulturo artistike nga mbarë trojet shqiptare, në sheshin Skënderbe në Tiranë.
Në vitet 2015 e 2016, ky grup mori pjesë në festivalin ndërkombëtar në Bikoxhe-Tuzlla, Bosnjë e Hercegovinë, në të cilin për hirë të Grupit folklorik “Shpëtimi” Medvegjë, në mesin e flamujve të shumë shteteve pjesëmarrëse valoi edhe flamuri kombëtar shqiptar.
Përveç aktiviteteve të cekura më lartë, ky grup mori pjesë edhe në aktivitetet kulturore në Austri, në Zvicër, në Maqedoni, në Mal të Zi etj.
Mbase me aktivietetet e veta Grupi folklorik mori pjesë edhe në shumë radio emisione, (në Kamenicë, në Gjilan), në shumë emisione televizive ( në RTK, në TV 21, në TV Vali, në TV Dasma, në RTV Shkupi, në TV e Tetovës etj).
Për pjesmarrje në aktivitetet kulturore Grupi folklorik “Shpëtimi” u vlerësua me çmime, mirënjohje e vlerësime të shumëta, nga të cilat po cekim:
- Çmimi për “Veshjen më autentike” nga festivali “Lulëkuqet e prillit”, Kamenicë;
- Çmimi “Instrumentisti më i mirë”, nga festivali “I këndojmë lirisë”, Klinë;
- Çmimi “Kënga më e mirë folklorike” nga festivali folklorik mbarkombëtar “Sofra Dardane, Bajram Curr dhe
- Çmimi “Veterani i festivalit” në festivalin folklorik “I këndojmë lirisë”, Klinë
- Shumë mirënjohje, çertifikata e falënderime nga festivalet e shumëta, vendore, kombëtare e ndërkombëtare.
Duhet cekur dy raste të ndihmave materiale dhënë këtij grupi në aktivitetin e tij:
- Dhurata e një pjese të materialit për rrobat kombëtare nga Ansambli kombëtar “Shota” Prishtinë;
- Ndihma financiare në shumë prej 50.00 eurosh, dhuruar nga drejtori i Muzeut kombëtar privat, z. Shtjefën Ivezaj, Tuz.
Të cilëvet përzemërsisht u jemi mirënjohës dhe i falënderojmë shumë.
Nacionali: Mendimi i juaj lidhur me aktivitetet kulturore në komunën tuaj?
Rexhep Abazi: Duhet cekur se kultura shqiptare, siç edhe e tërë gjendja e shqiptarëve në Medvegjë është skajshmërisht në gjendje të rënduar e të vështirë. Organet vendore e shtetërore fare nuk i japin rëndësi ruajtjes dhe zhvillimit të saj, nuk ndihmojnë asnjë nga aktivitetetet e saj, bile në shumë raste edhe i pengojnë.
Do ishte e udhës dhe më se e nevojshme, që shtetet shqiptare, Shqipëria e Kosova, të kenë në konsideratë këtë pjesë të kombit shqiptarë, në këtë kohë të pa kohë, të mbështesin kulturën dhe popullin shqiptar në Medvegjë në luftën e saj për të mbijetuar.
Në se kjo nuk bëhet ekziston rrezik i hapur, në mos për shuarje, për dëmtim apo stagnim të madh të kulturës shqiptare në komunën e Medvegjës.
/Nacionali/
No Comment