Poezi me ngjyrime emocionale

(Xhemë Karadaku, “Dhjetë me yll” sh.b. “Ura” Prishtinë, fq. 2010).
“Dhjetë me yll “ titullohet libri më i ri i shkrimtarit preshevar Xhemë Karadaku, i cili fëmijëve si gjithherë u ka falë dhe do t’u falë vargje të ngrohta, ashtu siç e njohim ne, dhe e lexojmë poetin Karadaku.

Ky libër mjaft voluminoz ka poezi të motiveve të ndryshme, të cilat bukur i rregulluar, duke i pajisur ato me figura të ndryshme. Ayo (poezitë) janë të drejtpërdrejta, janë të kapshme për imagjinatën e lexuesve të vegjël, poezitë rimohen në mes veti , kanë korrespondim të mirë, kanë edhe muzikalitetin, gjë që japin ngjyrime të ndryshme emocionale botës së fëmijëve.Brenda tekstit poetik lexuesit e vegjël gjejnë vargje të rregulluara mirë, me një seriozitet të madh nga poeti, i cili dinë mirë se me çka kënaqet kërshëria e fëmijëve, çfarë kërkojnë fëmijët nga ai dhe çfarë loje fjalësh i ndërthurë.

Librin poeti Xhemë e ka ndarë në dhjetë pjesë (cikle), në të cilat ka bërë një shtrirje të inspirimeve të tij, të cilat japin rezultatin e pritshëm dhe të frytshëm, si në aspektin tematik ashtu edhe në atë artistik.Përveç kësaj, ai, shkruan edhe vargje humoristike, me të cilat në një masë të ndjeshme i dëfren lexuesit, i shkruan botës shtazore dhe të bëmave të jetës së përditshme, të cilat bukur i ka shkrirë në vargje poetike.Ky libër gjithpërfshirës motivues, me gjithë koloritin artistik që e ka, fuqishëm themi se nga lexuesit do të jetë e mirëpritur, njëjtë siç janë pritur, lexuar dhe rilexuar nga kjo pjesë e shoqërisë, sepse nëpër vargje, lexuesi gjenë veten, lojën, këngën, gëzimin, largohet njëherë e mirë nga veset negative që e kanë kapluar njerëzimin, në theks të veçantë fëmijët dhe i kthehet pozitivitetit, të cilin duhet çdo fëmijë dhe çdo njeri ta ketë.

Në lexim të disa poezive të librit, gjejmë edhe poezi që në njëfarë mënyre e ngacmojnë imagjinatën e tyre dhe e fusin thellë në shtjellim jo të menjëhershëm të tekstit poetik, porse së rilexuari lexuesi e gjenë thesarin brenda minierës poetike të poetit Xhemë Karadaku.Libri i ka 90 poezi, të ndara apo të seleksionuara mirë në dhjetë ciklet poetike, në të cilat poezitë japin një kolorit mbresash në njërën anë, dhe një qëndrueshmëri dhe individualitet të fuqishëm të autorit në anën tjetër.Me këtë themi se poeti Xhamë Karadaku, si gjithherë më parë ka arritur të jetë miku më i mirë, më i lexuar dhe më i dashur i fëmijëve, sepse struktura dhe rregullimi i vargjeve të tij e bën të veçantë nga poetët tjerë që i shkruajnë kësaj shtrese të lexuesve.

Libri ka një vlerë të theksuar artistike dhe me këtë themi se ky libër i bën nderë letërsisë për fëmijë.Ky libër me 210 faqe është i ndihmuar materialisht dhe është botuar nga Ministria e Kulturës, Rinisë dhe Sportit të Republikës së Kosovës…

Bilall Maliqi