Doli nga shtypi libri më i ri për fëmijë i poetit Nijazi Kastrati, me titull “Ketrushi pa dhëmbë” përgatitur për shtyp nga Shoqata e Shkrimtarëve “Feniks” (Preshevë, Bujanoc dhe Medvegjë), botues “Lena” Prishtinë, 2020.
Nijazi Kastrati, poet që shkruan kryesisht për fëmijë edhe me këtë vëllim poetik e ka treguar zgjuarësinë dhe zellin për t’u servuar lexuesve të vegjël poezi sa më të kapshme për imagjinatën e tyre. Nuk është kjo hera e parë që poeti shkruan për këtë shtresë të shoqërisë, porse ka shkruar edhe më parë, duke shprehur ndjenjat e tij prej krijuesi, në motive të ndryshme, vetëm e vetëm t’i çelë udhë “çetës” së fëmijëve që të hyjnë brenda portës imagjinativo-poetike të tij.
Para nesh, tani, poeti Kastrati na del edhe me një libër me vjersha të këndshme për fëmijë, gjithnjë duke u thirrë me gjetjen motivuese, në individualitetin e tij krijues, në shprehjet e zgjedhura dhe të kapshme për fëmijët, si dhe për kuptimshmërinë e gjithmbarshme të poezive të tij.
Nijaziu me poezitë prezente në librin “Ketrushi pa dhëmbë”, dëshmon edhe njëherë seriozitetin që e ka për ligjërimin poetik për fëmijë, sepse, brenda lëndës poetike, ai ka sjellë poezi të larmishme, poezi përkushtimore për gjyshërit, dhe ajo çka është më interesante, ai i ka shkruar edhe botës shtazore, ku me një stil të veçantë dhe origjinal ia hapë kërshërinë lexuesve që të jenë sa më afër librit, por edhe sa më afër poezive të tij që do të ngjallin interes për lexim dhe rilexim.
Libri është me poezi të drejtpërdrejta, pa ndonjë hermetizëm, qoftë të lehtë, shprehjet janë shumë të kuptueshme dhe me këtë mund të themi se poezitë e kanë vlerën e tyre poetike. Poezitë janë të rimuara mirë, brenda rreshtave kemi edhe satirë të lehtë, poezitë kanë muzikalitetin dhe gjithçka që i nevijiten një libri me vlera të begatshme artistike…
Bilall Maliqi, shkrimtar
No Comment