Xhemë Karadaku emër i njohur i letërsisë…

Xhemë Karadaku, emër i njohur i letërsisë sonë shkruan për fëmijë dhe të rritur libra me poezi dhe me prozë, por është edhe editor i shtëpisë botuese “Ura” në Prishtinë, me të cilën shtëpi ka botuar një numër të konsiderueshëm të librave të zhanreve të ndryshme letrare. Ka redaktuar dhe recenzuar një mori veprash të shkrimtarëve të njohur. Stili i tij i shkrimit është i veçantë, sidomos kur i shkruan ligjerimit poetik për fëmijë. Kjo shihet edhe në lexim të librave të tij me poezi dhe të kompletit të tij të cilin e ka botuar kohë më parë me sh.b. “Ura”.

Pak biografi…

Xhemë Karadaku (Xhemail Halili), lindi në fshatin Ranatoc të Preshevës në vitin 1964.Është shkrimtar shqiptar. Xhemë Karadaku shkollën fillore e mbaroi në vendlindje, të mesmen në Preshevë, ndërsa fakultetin e Makinerisë në Prishtinë. Ka ndjekur studimet pasuniversitare në drejtimin Administrim Biznesi, në Universitetin “Dardania” në Prishtinë.

Bashkëpunon me revista të shumta në gjuhën shqipe. Bashkëpunoi kohë të gjatë edhe me Revistën për Enigmatikë “Horizonti” e një kohë ishte edhe anëtar i redaksisë. Është autor i qindra enigmave, sidomos i enigmave të rimuara. Në vitin 1994 botoi tufën me enigma “Gjej e qesh”, ndërsa në vitin 1998 kishte përgatitur për botim librin e dytë me enigma “Zgjidh e Zgjidh”, i cili për shkak të rrethanave të kohës mbeti i pabotuar.

Është prezantuar në Leksikonin e shkrimtarëve për fëmijë, të përpiluar nga shkrimtari i njohur Odhise Grillo dhe në Antologjinë e Letërsisë për fëmijë “Lule për lulet” të botuar në vitin 2014. Në vitin 2014, libri me poezi për fëmijë “JAM I MADH” u nderua me çmimin “Ymer Elshani” nga Karvani Letrar “Agim Deva” si libri më i mirë i botuar në Kosovë. Në konkurse të ndryshme letrare, në Kosovë e më gjerë, është fitues i mbi 30 shpërblimeve për poezi, tregime dhe humoreska. Është editor i Shtëpisë Botuese “URA”, Prishtinë. Është redaktor i botimeve të letërsisë për fëmijë në w.w.w.librariaelektronike.com. Është anëtar i Lidhjes së Shkrimtarëve të Kosovës. Xhama punon zyrtar në Kuvendin e Republikës së Kosovës. Jeton në Prishtinë.

Veprimtaria letrare

Legjendë e re, 1992

Natë mbi mua, 1994

Gjej e qesh, 1994 (libër me enigma)

Pse iu kall mjekra gjyshit, 1995

Zvarranikët, 1995

Trimi më i madh në botë, 1999

Kalikuse, kalikuse a ma gjen një nuse, 2000

Ëndërr me ëndrra, 2000

Feniksi nuk është ndryshe, 2000

Lavjerrësi i kohës, 2002

Histori për një dashuri, 2003