Kryetari i Këshillit Kombëtar në Luginë të Preshevës, Ragmi Mustafa, ka thënë se Serbia ka qasje armiqësore ndaj shqiptarëve që jetojnë atje.

Ai në Sytë 7 në Klan Kosova ka thënë se kjo pjesë është duke u zbrazur përçdo ditë.

“Nuk është represioni si në vitet ‘90, kur ka qenë gjithçka e dukshme. Ka masivizim të zbrazjes së vendbanimeve sidomos në Medvegjë – katër mijë shqiptarë e kanë pasivizuar vendbanimin. Ata nuk mund të marrin dokumente dhe nuk mund t’i shfrytëzojnë të drejtat. Bëhet spastrim i heshtur etnik”, është shprehur Mustafa.

Mustafa ka pohuar se karshi situatës së atjeshme, ka një qasje të re të Republikës së Kosovës dhe asaj të Shqipërisë.

“Këto dy vitet e fundit është shumë proaktive. Ka pasë nevojë shumë më herët që të intervenohet, por tash është shumë më proaktive, duke parë angazhimet e Ministrit të Jashtëm në detyrë, Gent Cakaj dhe qeverive përkatëse. Gjatë pandemisë u ndanë 500 mijë nga Kosova për Preshevën, Medvegjën dhe Bujanocin. Projekti më i madh dhe domethënës është sigurimi i teksteve mësimore nga Shqipëria, ku meritë ka ish ministrja, Besa Shahini”.