Nga shtëpia botuese “Lena” në Prishtinë, doli nga shtypi libri më i ri me poezi për fëmijë “Ejani të vallëzojmë”, i shkrimtarit Bilall Maliqi.
Ky libër është i përshtatshëm për fëmijët e ciklit të ulët shkollor, sepse brenda librit ka një kolorit të poezive që ju flejnë në shpirt kësaj grupmoshe të lexuesve.
Redaktor i librit është shkrimtari i njohur për fëmëjë, Veli Veliu, recensent, poeti dhe publicist i njohur, Sevdail Hyseni, redaktori gjuhësor, Mr. sc. Shefat Ademi, korrektori, Alban Fejzullahi, ndërsa kopertinën dhe dizajnin grafik, Laura Shulemaja.
Ky është libri i 37 i autorit, i dhjeti për fëmijë.
Lidhur me vlerat artistike të librit kemi mendimin e recensentit të librit poetit e publicistit të njohur Sevdail Hyseni:
Filozofia e vallëzimit të përbashkët
Libri më i ri për fëmijë me titull simbolik “Eja të hyjmë në valle” (Ejani të vallëzojmë), e bënë autorin Bilall Maliqi, një zë të fuqishëm të artit letrar kushtuar botës shpirtërore të të rinjve, të mbushur me ndjena, pasione e ëndrra pa fund.
Një rini, që sipas autorit Bilall Maliqi, nuk njeh ndasi, djallëzi, smirë, hasmëri, urrejtje e përçarje, por që dëshiron dorë për dore të hyjë në valle, për të reflektuar unitet sikur ngjyrat në ylber, lulet në livadhe, shkronjat në abetare, bletët e fluturat në kopsht, qengjat në tufë etj, që kështu të bashkuar ia shtojnë bukurinë jetës, shoqërisë dhe ardhmërisë.
Vargut të librave të mëhershme me poezi për fëmijë si: Kodra e luleve, Shtëpia afër pyllit, Hëna flet me lule, Këngë zogu, Ëndrra që më dha gëzim, Sytë e Erës, Blini në Blinishtë, Lule për kurorë dhe romani për fëmijë Ëndrra e Malit, i shtohet edhe libri më i ri për fëmijë “Eja të hyjmë në valle”. Por, jo vetëm kaq, shkrimtari Bilall Maliqi, ka shkruar edhe poezi për të rriturit, proza poetike, aforizma, vështrime letrare, tregime dhe një roman për fëmijë, pa lënë mangut intervistat dhe shkrimet e tjera për art e kulturë.
Që nga vjershat e para që i prijnë vëllimit poetik “Eja të hyjmë në valle”, të ndara në pesë cikle, me gjithsej 51 poezi, përshfaqet një botë e pasur shpirtëror e autorit, plot me ndjesi për ëndrrat, dëshirat, shpresat e të rinjve, te cilët me veprimet e tyre, mbushin plot shpirt dhe gjallëri prindërit dhe rrethin shoqëror ku jetojnë me gëzimet e hidhërimet e tyre.
Kjo më se mirë vërehet te pyetjet e Malit të vogël, një personazh shumë kureshtar të dijë se ç’ka është liria? A mund të vizatohet”, Ku fshihet? Çfarë ngjyre ka? Prapë pyet Mali/ Me vendosmëri!/ Pse këndej kufirit/ Nuk kemi liri? Gjyshi i përgjigjet nipit kureshtar se “Liria është diell” e mbi të gjitha:
“Është e kuqe si qershia
Ku s’mbaron dashuria! »,
poezia « Pyet Mali ».
Ndërsa në poezinë që mban titullin vëllimi poetik : “Eja të hyjmë në valle”, autori me një përshkrim të hollë, plot art e figura stilistike, këtë botë e krahason me një planet, prej nga apelon: « Eja të hyjmë në valle, Bashkë me shkronjat n’abetare”, ngase jeta e ndarë e përçarë sikur nuk ka kuptim, logjikë dhe përparim.
Gjithashtu, në poezitë e tjera të këtij cikli përshkruhen bukuritë natyrore të vendlindjes së autorit, me rrjedhën gurgulluese të lumenjve, pastaj Shpella e Yllionit, Rrafshi dhe Xharrima, toponime karakteristike të fshatit ElezBali, që shtrihet në Komunën e Preshevës.
Fëmija për autorin Bilall Maliqi, është qershia mbi tortë, është kulmi i dashurisë prindërore dhe ardhmëria e kombit. Për gjyshërit nipat e mbesat, kur rrinë me ta në shoqëri, janë mëlmesat që ata i bëjnë të lumtur, i bëjnë t’i harrojnë hallet e pleqërisë dhe të lirohen nga problemet ditore.
Në ciklin e II-të me titull « Lugina e lotëve », lexuesi ka çka të lexoj: vjersha kushtuar bukurive natyre te vendbanimeve preshevare, si dhe vargje kushtuar më të dashurve : nënës, gjyshes, vëllait, Xhaxhit Bim etj.
Nëpër strofat e këtyre vjershave me plot dashuri, dhembshmëri e krenari përshkruhen duke u shkrirë në një dhembja e gëzimi, dashuria dhe nostalgjia, të cilat i përshkojnë banorët e Luginës së Preshevës, së cilës duke i munguar liria mbi të gjitha, Lugina e autorit nuk është vetëm Luginë e luleve, por edhe e lotëve dhe e mallëngjimit, të cilat hetohen ne disa poezi si : « Lugina e përlotur », « Kështu tha xhaxhi Bim », pastaj si ato : « Nëna ime », Lulja e nënës », « Duart e gjyshes », « Vëllait », « Klea ka një hall » etj.
Sa shumë kemi dëshirë
Të gjithë të jemi të lirë.
………….
Luginë e ndarë me kufi
E përlotura në vetmi.
(Lugina e përlotur)
Në vazhdim të ciklit të III-të “Festa e shkollës”, autori përmes personazheve kaq të dashura si: Klesa, Lumi, Bora, Erandi, Ariona si dhe e vogla Buqe, që bashkëmoshatarët dhe të tjerët e thërrasin me simpati Burbuqen, janë motorët e lëvizjes së dashurisë ndaj bukurive natyrore dhe ofrimit të pikave të ngrohta të lumturisë për të dashurit që i rrethojnë.
Cikli i IV-të, fillon me poezinë “Gënjeshtra”, sipas autorit ajo është një ves i keq e i shëmtuar, e cila sa më shpesh përsëritet bëhet më e dëmshme për njerëzit. Kjo poezi si dhe të tjerat japin një mësim moralizues dhe edukativ për grupmoshat e ndryshme se “rrena i ka këmbët e shkurta” dhe lehtë zbulohet, ajo duhet të demaskohet, në mënyrë që mos të gjeje shprehje veprimi në botën njerëzore.
Poezitë në vazhdim të këtij cikli i kushtohen të kafshëve e shpezëve shtëpiake dhe atyre që jetojnë në male, të cilat janë të dashura për fëmijët dhe të rriturit si: kaprolli, lepuri lodër, rosaku trim, qukapiku, macja laroshe, macja lazdrake, miushi etj. Gjithashtu, në kuadër të këtij cikli veçohet poezia “Vargjet e poetit”, të cilat janë të arta, të lehta, të ngrohta, të cilat sjellin rritë e shpresë për të tashmen dhe të ardhmen.
Në ciklin e V-të, i cili për dallim nga të parat përbëhet pre 11 poezive, me titull kuptimplotë “Ardhmëria”, ku autori ka shkrirë e derdhur ndjenjat më sublime për botën e të rinjve, të cilët duhet të ecin vertikalisht përpara, me shpresat dhe ëndrrat, që i shoqërojnë në jetë.
“Çelësi i ardhmërisë”, poezia që mban këtë titull sipas poetit: Është mësimi / Sa shumë çelësa
i gjetën duke lexuar/ Udhën e të mirës/ E kanë zbuluar/.
Personazhet e këtij vëllimi poetik për fëmijë, janë nga bota reale dhe imagjinative, janë sinonim i dashamirësisë, jo vetëm për gjyshërit e gjyshet, por edhe të tjerët, për rrethin dhe shoqërinë, kudo që gjenden dhe ngado që shkojnë.
Personazhet e këtij vëllimi poetik, gjithashtu, krahason me yjet lart në qiell, me rrezet diellit, me lulet në kopsht, me zogjtë e malit, me bardhësinë e dritës, me ylberin, me shkronjat e abetares, me stinët e vitit etj. Krahas epiteteve lavdërimi, kemi poezi ku kritikohen veset dhe gabimet njerëzore, sidomos ato që dalin nga gënjeshtra, mendjemadhësia, cinizmi dhe hipokrizia.
Kultura gjuhësore dhe ajo figurative në vëllimin poetik “Eja të hyjmë në valle”, të autorit Bilall Maliqi, është e pasur me pastërtinë e saj dhe figurat stilistike si: krahasim, sinonim, metafora, alegoria, që i bënë vjershat e këndshme dhe të kapshme për lexuesit e grupmoshave të ndryshme.
Autorit i dëshirojmë suksese në vazhdimin e botimit të librave si ky dhe lexuesve fat, që kanë në dorë vëllimin poetik, i cili lexohet me ëndje dhe pasion nga të gjithë, pa dallim moshën e gjininë.
/Nacionali/
No Comment