Puna e deritashme dhe planet e vitit 2020 të Komisionit për Kulturë në kuadër të KKSH-së

Komisioni për Kulturë në KKSH, gjatë vitit që po e lëmë pas ka pasur mbledhjet e rregullta me anëtarët e saj, duke trajtuar kështu tema me interes për kulturë në nivel të Luginës së Preshevës.Dihet mirëfilli se kultura është një nga shtyllat e funksionimit të KKSH-së, dhe është kartë e identitetit të një kombi, atëherë mund të themi se ne, Komisioni për Kulturë, duke pasur parasysh mundësitë materiale që i kemi si institucion, kemi vepruar në terren, në bashkëpunim me OJQ-të, ta ruajmë identitetin tonë kombëtar, qoftë me mbështetje morale, po ashtu në fund edhe materiale (në kuadër të konkursit për OJQ-të). Kemi qenë të pranishëm nëpër organizime kulturore e letrare këtu në tri komunat tona, përkrahës dhe pjesëmarrës edhe në shumë tubime me karakter kulturor si: përurime librash nga autorët vendor dhe të atyre të trojeve të shkëputura shqiptare, me qëllim të avancimit të kësaj fushe me rëndësi jetike për neve si komision, për KKSH-në dhe për shqiptarët e kësaj krahine të populluar me shumicë shqiptare.Nga janari deri më tani Komisioni për Kulturë ka mbajtur pesë mbledhje, të cilat kanë dhënë sinjal të vyeshëm dhe pozitiv për KKSH-në. Për këtë u jam mirënjohës anëtarëve të Komisionit, për kontributin e dhënë në mbledhjet e organizuara: z. Mentor Nuhiut, zonjës Arbnora Bilallit, z. Bujar Ademit dhe z. Selman Selmanit.

Në të ardhmen si prioritet të Komisionit për Kulturë e shoh angazhimin tonë grupor, jo vetëm të Komisionit, por edhe të KKSH-së në përgjithësi për hartimin e një projekti madhor drejtuar dy Ministrive tona dhe asaj të Serbisë për shtrëngimin, konzervimin dhe ruajtjen e Kalasë së Preshevës, e cila ka ngelur në mëshirë të fatit, dhe se nga vetë shkaqet natyrore vjen deri te rrënimi i tërësishëm i saj, dhe jo vetëm kaq edhe disa monumente të tjera të tri komunave tona, që bien në grupin e trashëgimisë sonë të ruhen, dihet këto kërkojnë edhe koston e tyre.Prioritet tjetër është edhe kërkesa drejtuar administratave së komunave tona për vendosjen e tabelave orientuese për tek vendet me rëndësi të trashëgimisë sonë natyrore, në mënyrë që vizituesit ta kenë më të lehtë gjetjen dhe qasjen e tyre deri tek vendi i duhur.Prioritet tjetër është edhe mundësia e shtypjes së një katalogu me ngjyra me të gjitha objektet e trashëgimisë sonë, e që botues të jetë KKSH-ja dhe ato t’u shpërndahen vizitorëve që vijnë për vizitë në KKSH dhe në Luginë në mënyrë që të njihen me këto monumente të trashëgimisë, si dhe shtypja e një katalogu me të gjitha ngjarjet kulturore gjithkombëtare.

Për vitin 2020 do të vazhdojmë me mbledhjet tona të rregullta, edhe pse këto do të jenë edhe më të shpeshta (së paku nga një mbledhje në muaj), për t’i sheshitur të gjitha aspektet kulturore, pastaj do të kemi edhe takime me kryetarë të OJQ-ve për bashkëpunim dhe bashkërendim të aktiviteteve të tyre dhe akiviteteve burimore të Komisionit.Do të përpiqemi të organizojmë konferenca, tryeza të rrumbullakëta me tema të ndryshme që e preokupojnë kulturën në të gjitha segmentet e saj.Për fund të gjithë anëtarëve të Komisionit të cilin e drejtoj dhe të gjithë shqiptarëve anekënd botës ua uroj Vitin e Ri 2020, me shpresë se viti që po hyjmë do të na gjejë më të organizuar në të gjitha aspektet e jetës.