“…Fundamentalisht konsideroj se prioritet kryesor është dhe vazhdon të jetë përdorimi i gjuhës shqipe nëpër institucionet publike, qofshin ato republikane ose lokale…” thotë ndër të tjera kryetarja e Komisionit për Përdorim Zyrtar të Gjuhës dhe Shkrimit Shqip, znj.Hana Emerllahu-Arifi, teksa flet per sfidat sukseset dhe planet e vitit të ardhshëm të Komisionit që ajo udhëheq në kuadër të Këshillit Kombëtar Shqiptar.
Nacionali.info :Si e vlerësoni për një vitë funksionimin e komisionit tuaj që e drejtoni në kuadër të Këshillit Kombëtar Shqiptar ?
Përdorimi i gjuhës dhe shkrimit shqip, padyshim që është njëri ndër faktorët kryesor të kultivimit dhe ruajtjes së identitetit të një kombi. Për këtë arsye besoj që komisioni që drejtoj unë është i një rëndësie të veçantë dhe me një përgjegësi të madhe në kuadër të KKSH-së.
Gjatë vitit të parë të funksionimit të këtij komisioni nën udhëheqësinë e re është normale të kemi pasur sfida të konsiderueshme e me të cilat konsideroj që Komisioni për Përdorim Zyrtar të Gjuhës dhe Shkrimit Shqip I ka dalur ballë me strategjinë e duhur. Gjatë këtij viti vlenë të theksohet përpilimi i katalogut të emrave dhe mbiemrave shqip , e që u realizua në bashkëpunim me OSCE dhe Ministrinë e Administratës Shtetërore dhe Vetadministrimit Lokal. Në këtë mënyrë tani e tutje emrat dhe mbiemrat shqip të regjistrohen drejt dhe pa gabime në librat e amzës, dhe të njejtit mos të shtrembërohen siç ka ndodhur më herët.
Gjithashtu, komisioni që unë drejtoj ka ndjekur me interest të veçantë emërtimin e rrugëve në vendbanimet Shqiptare, duke u munduar kështu që mos të i tërhiqet vëmendja si në rastin e Medvegjës dhe të kundrështojmë çdo iniciativë apo tendencë të ndryshimit të emërtimeve shqiptare.Gjithashtu dua të falënderoj pafundësisht edhe anëtarët e Komisionit për përdorim zyrtar të gjuhës dhe shkrimit shqip për punën, idetë dhe vullnetin e treguar gjatë këtij viti.
Nacionali.info: Çka konsideroni me prioritet në kuadër të Këshillit Kombëtar Shqiptar dhe Komisionit që drejtoni?
Fundamentalisht konsideroj se prioritet kryesor është dhe vazhdon të jetë përdorimi i gjuhës shqipe nëpër institucionet publike, qofshin ato republikane ose lokale, gjë që sigurohet edhe me anë të kushtetutës dhe ligjeve në fuqi. Mungesa e saj neve na penalizon pastaj në çdo gjë dhe ngecemi aty ku jemi dhe kthehemi prapë tek zeroja. Prioritet tjetër do të quaja të shkruarit e drejtë dhe në dygjuhësi (serbisht-shqip) emrat e vendbanimeve dhe sinjalizimeve rrugore në vendbanuimet shqiptare, gjë që e kemi kërkuar me ngulëm edhe me kerkesë zyrtare , ku shpresojmë që kjo gjë do të arrihet shumë shpejt.
Cilat janë planet për vitin 2020-të?
Këtë vit me ndihmën e Misionit të OSCE-së, të cilin e falënderojmë për bashkëpunimin, kemi realizuar përpilimin e strategjisë së Këshillit Kombëtar Shqiptar, e cila do të na shërbej si një udhërrefyes për zgjidhjen e problemeve në fushat me të cilat edhe ka kompetencë KKSH. Mund të themi që në të kemi vendosur prioritet tona edhe në fushën e përdorimit zyrtar të gjuhës dhe shkrimit shqip, me anë të së cilës do veprojmë vitin që po hyjmë. Dhe padyshim do vazhdojmë të këmbëngulim me ngulm zbatimin e përdorimit të gjuhës shqipe nëpër institucionet publike.
Ju faleminderit
/Nacionali/
No Comment