A do të jenë mjaftueshëm të matur për të vënë interesat e shqiptarëve të Luginës përpara interesave partiake apo do të kufizohen në disa grupacione politike?
Sipas afatit të rregullt ligjor, në pranverën e këtij viti kalendarik mund të ketë zgjedhje të rregullta parlamentare në Republikën e Serbisë.
Shqiptarët e Luginës se Preshevës deri më tani janë përfaqësuar si pjesë e këtij procesi zgjedhor, me nga një apo edhe dy ulëse në kuvendin popullor në Beograd.
Përfaqësimi i shqiptarëve vlerësohet si proces imediat, për shkak të mundësisë që të gjitha problemet dhe padrejtësitë me të cilat ballafaqohen shqiptarët e Luginës gjate përditshmërisë, të paraqiten drejtpërsëdrejti.
Aty dëgjohet zëri nga të gjitha institucionet përkatëse shtetërore, madje edhe nga prezenca e faktorit ndërkombëtar, është thënë nga liderët e Luginës dhe vet faktori ndërkombëtar.
Pjesëmarrja në zgjedhjet parlamentare në Serbi, madje përfaqësimi i shqiptareve të Luginës me deputet, është përkrahur dhe sugjeruar nga diplomatë të shteteve amë, Shqipërisë e Kosovës, si edhe të faktorit ndërkombëtar.
Këtij procesi të rëndësishëm politik i ka paraprirë me pjesëmarrje në zgjedhje si ato lokale, parlamentare dhe në Këshillin Kombëtar Shqiptar, Partia për Veprim Demokratin, e cila ka arritur në dy momente të historisë së vonshme të sigurojë edhe dy ulëse në parlament.
Kjo temë në vazhdimësi ka nxitur debat e reagim. Është diskutuar madje edhe në konferencën e fundit të mbajtur në Republikënbe Shqipërisë me temën “Roli i Shqipërisë në promovimin e interesave kombëtare të shqiptarëve në hapësirën e Ballkanit Perëndimor”, e shqiptarët duhet të jenë pjesëmarrës në të gjitha proceset zgjedhore në vendin ku jetojnë.
Natyrisht interesim për pjesëmarrje kanë shprehur edhe subjektet tjera politike në Luginë duke insistuar t’i qasen këtij procesi politik që deri më tani nuk kanë ndarë të njëjtën qasje, e disa nuk kanë qenë pjesë e zgjedhjeve të mëparshme parlamentare, por tash si subjekte të reja insistojnë të jenë pjesë e proceseve zgjedhore.
Diplomacia shqiptare ka shprehur interesim për përkrahjen e shqiptarëve të Luginës së Preshevës në takimin e mbajtur ne konferencën rajonale në Tiranë me Ministrin në detyrë për Evropën dhe Punët e Jashtme Gent Cakaj dhe liderëve te Luginës.
Ai veç tjerash ka theksuar tri nga temat që mund të jenë në një axhendë të përbashkët duke vlerësuar se shqiptarët e Luginës nuk janë vetëm një faktor margjinal por një aset shumë i vyer shoqëror e kombëtar.
”Ne do të vazhdojmë të artikulojmë shqetësimet e përbashkëta dhe të punojmë pakursyer në shërbim të mbrojtjes së të drejtave të tyre” nënvizoi i pari i diplomacisë shqiptare. Më pas theksoi se “pasivizimi i vendbanimeve në Luginë të Preshevës nuk përbën vetëm qasje përjashtuese shoqërore por edhe dëmtim përmbajtësor të demokracisë atje;
së dyti, njohja e teksteve mësimore në shkollat fillore e të mesme, e përdorimi i papenguar i simboleve kombëtare është jo vetëm në shërbim të ruajtjes së identitetit të tyre por është kusht i zhvillimit të përgjithshëm atje;
së treti, përfshirja proporcionale në të gjitha nivelet e institucioneve shtetërore do të mbetet një kauzë që do t’i japim zë vazhdimisht e bashkërisht, pati theksuar veç tjerash Gent Cakaj.
Si duket do të intensifikohen angazhimet për arritjen e një liste të përbashkët të shqiptarëve të Luginës për zgjedhjet parlamentare në Serbi edhe javëve në vazhdim.
E si do të vijojnë ngjarjet, do të varet nga konstruktiviteti dhe përgjegjësia që kanë marrë partitë politike që veprojnë në Luginë të Preshevës.
/Nacionali /
No Comment