Sot në orët e pasdites, kryeministri në detyrë Albin Kurti, ka zhvilluar dy biseda telefonike, njërën me Kryetarin e Komunës se Bujanocit, Shaip Kamberi dhe tjetrën me Kryetarin e Komunës së Preshevës, Shqiprim Arifi.
Dy kryetarët, Kamberi dhe Arifi e njoftuan Kurtin mbi menaxhimin e situatës me virusin Korona.
“Deri me tani janë tre të infektuar në Bujanoc, kurse asnjë i infektuar në Preshevë. Autoritetet lokale të të dy komunave janë të përkushtuara në luftimin e pandemisë COVID-19 për gjithë qytetarët e saj”, thuhet në njoftimin për media, transmeton Indeksonline.
Kurti në emër të Qeverisë së Kosovës dy kryetarëve, Arifit dhe Kamberit, ua shprehu gatishmërinë e mbështetjes socio-ekonomike dhe humanitare. Për të konkretizuar përkrahjen me kryetarët Arifi dhe Kamberi do të komunikojë edhe Ministri në detyrë i Financave dhe Transfereve, Besnik Bislimi.
Kujtojmë se kryetari i Këshillit Kombëtar Shqiptar, Ragmi Mustafa kohët e fundit ka kërkuar disa herë nga qeveritë e Republikës së Kosovës dhe Shqipërisë të kenë vëmendjen dhe ndihmojnë Luginën, pasi masat e ndërmarra nga shteti kanë paralizuar të gjitha ekonomitë familjare nga e cila sigurojnë kryesisht jetesën, në mënyrë që mos të kthehet Lugina në një geto humanitare.”
/Nacionali /
No Comment