Bashkohen shoqatat nga Lugina që veprojnë në Zvicër

Nënshkruhet memorandum mirëkuptimi mes shoqatave nga Lugina e Preshevës në Zvicër

Rreth njëzetë organizata marrin nismën për krijimin e Bashkimit të Shoqatave të Luginës së Preshevës në Zvicër ka bërë të ditur Ambasada e Shqipërisë në Zvicër.

Në datë 29 maj 2021, rreth njëzetë shoqata të Luginës së Preshevës me aktivitet në Zvicër, nënshkruan një memorandum mirëkuptimi duke u angazhuar të krijojnë Bashkimin e Shoqatave të Luginës së Preshevës në Zvicër.

Duke qënë se Zvicra është vendi me më shumë mërgimtarë nga Lugina e Preshevës, kjo nismë ka si qëllim rritjen e nivelit të bashkëpunimit e bashkërendimit të veprimtarisë së shoqatave të Luginës së Preshevës në Zvicër në mënyrë që të kenë një përfaqësim të njëzëshëm dhe koordinim të punës e përpjekjeve për ruajtjen e gjuhës, kulturës dhe traditës shqiptare.

Në këtë takim ishte i pranishëm edhe ambasadori i Republikës së Shqipërisë Ilir Gjoni i cili e vlerësoi dhe përshëndeti shpalljen e kësaj nisme si dhe nënvizoi mbështetjen pa rezerva nga ana e Ambasadës së Republikës së Shqipërisë. Të pranishmit i përshëndeti dhe sekretari i tretë i Ambasadës së Republikës së Kosovës në Bernë, z.Gjenis Haxhimehmeti.

Këtë veprim e ka mirëpritur edhe kryetari i Këshillit Kombëtar Shqiptar, Ragmi Mustafa, ku përmes një postimi në Facebook u shpreh:

Një super lajm nga diaspora në Zvicër🇦🇱

HISTORIKE: BASHKOHEN SHOQATAT E LUGINËS NË ZVICËR

Përshëndes dhe përgëzoj nënshkrimin e memorandum mirëkuptimit të më se 20 shoqatave nga Lugina e Preshevës në Zvicër. Iniciativë kjo për të krijuar Bashkimin e Shoqatave të Luginës së Preshevës.

Historike që diaspora e Luginës në Zvicër do të ketë përfaqësim të njëzëshëm dhe koordinim të aktiviteteve e përpjekjeve për ruajtjen e gjuhës, kulturës dhe traditës shqiptare.

Vlerësoj lartë angazhimin e Ambasadorit të Republikës së Shqipërisë, z. Ilir Gjoni, e në veçanti diplomatin nga Lugina e Preshevës z. Valon Gashi.

Përfundimisht, ndërmarrja e një qasje strategjike me Ministrinë për Evropën dhe Punët e Jashtme të Republikës së Shqipërisë dhe Këshillit Kombëtar Shqiptar ka nisur të jep rezultatet e veta.

Përfshirja e Luginës në diplomacinë shqiptare është vizioni për diasporën tonë dhe avancimin e çështjes së Luginës.

Përmes organizimit e mobilizimit të bëjmë unifikim e gjithëpërfshirje, gjithëpërfshirje për avokim, avokim për veprim, veprim për avancim.

Urime diaspora jonë në Zvicër!
Përgëzoj secilin nga nënshkruesit veç e veç!
Shembull i jashtëzakonshëm!
Me fat!