Delegacioni politik nga Lugina e Preshevës ishte në një takim me kryeministrin e Republikës së Kosovës z. Avdulla Hoti, me të cilin biseduan rreth mundësisë së ndihmës për shqiptarët e Luginës së Preshevës si dhe hapja e zyrës për ndihmë qytetarëve të Luginës, për të cilën politikanët shqiptarë falënderuan kryeministrin Hoti për këtë iniciativë të mirëpritur për shqiptarët e Luginës së Preshevës.
Kryeministri i Kosovës Avdullah Hoti përcolli se vendimi për krijimin e “Zyrës për Ndihmë për Qytetarët e Luginës së Preshevës” brenda kabinetit të tij është aprovuar.
Puna e asaj zyre do t’i kushtohet lehtësimit dhe përmirësimit të jetës së qytetarëve nga Bujanoc, Preshevë dhe Medvegja, që jetojnë në Kosovë, me theks të veçantë në arsim, kulturë dhe ekonomi.
Në takimin në Prishtinë, Hoti diskutoi situatën aktuale politike dhe ekonomike në Kosovë, sfidat në luftën kundër COVID-19, si dhe pozicionin e shqiptarëve në Luginë, raportuan mediat shqiptare.
“Zyra do të merret gjithashtu me çështje të tjera që nuk janë të shënuara në këtë vendim, por që paraqiten si kërkesa dhe nevoja të mundshme të qytetarëve që jetojnë në Luginën e Preshevës,” tha Kryeministri Hoti.
Nga ana e tyre, përfaqësuesit e shqiptarëve falënderuan kryeministrin Hoti për pritjen, veçanërisht për hapjen e Zyrës, duke shtuar se intensifikimi i bashkëpunimit është me përfitim të ndërsjellë.
Delegacioni i Luginës ishte në përbërje: Ragmi Mustafa (PDSH), Nagip Arifi (PD), Shaip Kamberi deputet dhe kryetar i PVD-së, Ardita Sinani (PVD), Ragmi Mustafa (KNSH), Veli Mustafa (APN), Sami Salihu (LR), Shqiprim Musliu (LPD).
/Nacionali/
No Comment