Që në hyrje të Galerisë, ku ekspozohen veprat e tij, sytë dhe vëmendja e atyre që kanë lidhje emocionale me emrat eminentë të artit dhe kulturës drejtohen te portretet e tyre. Ato bartin në vete kompleksitetin krijues të vetë autorit, copëza të karakterit të tyre dhe mbi të gjitha vlerësimin e rrugëtimit të tyre jetësor.
Personazhet eminente të popullit shqiptar e përtej tij rrumbullakohen në 16 portretet e Nagip Tashit. Të punuar me dru, bien në sy shikimi i mprehtë i Bekim Fehmiut, ngrohtësia prej artisteje e Leze Qenës e urtësia që shfaq portreti i Anton Çetës. Pos tyre, Ibrahim Kodra, Adem Mikullovci, Gjergj Kastrioti, Ukshin Hoti janë pjesë e mozaikut të portreteve. Zdrukthëtari Nagip Tashi nuk është ndalur me kaq. Si artist autodidakt ai ka gdhendur edhe portretet e Adem Demaçit, Ibrahim Rugovës, Arbën Xhaferit, Hadi Shehut, Muharrem Kadriut, Llukman Halilit, Abdurrahman Shalës e Ridvan Qazimi – Vajës, ka kaluar kufijtë duke paraqitur edhe presidentin amerikan, Barack Obama. Secila prej 16 veprave të ekspozitës personale “Distanca”, autorit i ka marrë më shumë se një muaj kohë. Duke qenë teknikë delikate, çdo krijim të thellon për mënyrën e përngjasimit të portretit me protagonistin. Ai e mbledh çdo karakteristikë emocionale të personazhit dhe e “rikrijon” në dru.
Nga Tërrnofci i Bujanocit, Tashi ka marrë rrugën për në Prishtinë dhe ia ka sjellë publikut kosovar frymëzimet artistike prej më shumë se dhjetë vjetësh, me një emërtim që ka shumë kuptime të shtresuara brenda saj. Ekspozitën në “KultPlus Caffe Gallery”, që është hapur të enjten mbrëma, e quan “Distanca” si simbolikë të shkrirjes së kufijve. Dimensioni tjetër ndërlidhet me faktin e pamundësisë së soditjes së veprave për nga afër. Portretet mund të dallohen vetëm nga distanca. Tashi këtë e sheh edhe si një lloj respekti për krijimet, sepse, sipas tij, publiku dhe vepra duhet të kenë një lloj largësie mes vete.
“Vazhdimisht kam dashur t’i thyej kufijtë. Të dal përtej Luginës së Preshevës. Ekspozita sikur i paraprin këtij bashkimi”, ka thënë ai.
Teknikën të cilën e përdor e përmend me modesti, duke thënë se të tjerët nëpër botë dinë ta bëjnë edhe më mirë. Por e cilëson si “gjetje artistike” të tij, të cilën e shpreh përmes transformimit të copëzave të drunjve.
“I kam dashtë edhe i kam punuar”, thotë kur pyetet për personalitet. “Kam filluar nga Bekimi, sepse jam adhurues i teatrit dhe filmit e deri te figurat politike. Kanë bërë shumë për komb, ndërkaq unë veç një pjesë të jetës sime po ua kushtoj atyre e ata gjithë jetën”, ka thënë ai.
Derisa ka folur për personalitetet, Bekim Fehmiun e ka përmendur më së shumti. Ka thënë se Beogradi vazhdon ta çmojë Fehmiun më shumë se kryeqytet shqiptare.
“Pasi e kam përfunduar portretin e Bekim Fehmiut, e kam thirrë nënën dhe e kam vendosë njëzet metra larg punimit, e kam pyetë kush është, tha: Bekim Fehmiu, kështu që kjo dëshmon se unë jam shumë i lidhur emocionalisht me këto punime, se përndryshe nuk do t’i punoja”, ka thënë ai në ceremoninë hapëse.
Titullin e ekspozitës e ndërlidh edhe me pozitën gjeografike dhe kulturore të vendit ku jeton. Ai thotë se Tërnoci ka distancë fizike me Beogradin dhe se nuk ka aktivitete artistike edhe aq. Kjo ka qenë një nga shtysat e këtij titullimi.
“Kjo mundësia që m’u dha mua është nder i madh, jo vetëm për mua, por edhe për këto figura”, ka thënë Tashi, derisa ka shtuar se destinacioni i radhës i “Distancës” është Tirana. Ekspozita “Distanca” do të vazhdojë të qëndrojë e hapur për dy javë në “KultPlus Caffe Gallery”.
No Comment