Doli nga shtypi libri më i ri i Dr.sc. Jahi Murati-Staneci, me titull “Mundësitë turistike të komunës së Preshevës”, botues sh.b “Albas” Preshevë, 2022.
Lidhur me rëndësinë dhe vlerat artistike të librit, po japim mendimin njërit nga redaktorët e librit, shkrimtarin, Bilall Maliqi.
Fjala e redaktorit
Dr. Jahi Murati-Staneci, autor i shumë librave të karakterit shkencor e monografik, të cilat për lexuesit janë të njohura, dhe kanë lënë gjurmë të pashlyeshme në shkencën e gjeografisë dhe të librave të tjerë, të të gjitha karaktereve, botime këto nga kritika përkatëse janë cilësuar me vlera të larta shkencore dhe artistike.
Tani lexuesit dhe vizitorët e mundshëm, që do ta vizitojnë komunën tonë me fshatra që gravitojnë brenda saj, në duar të tyre do ta kenë një botim special, me titull “Mundësitë turistike të komunës së Preshevës”, libër panoramë ku sheshohen bukuritë natyrore dhe vendet kyçe të komunës sonë, ku vizitorët do të gjejnë kënaqësitë e tyre, duke parë bukuri të rralla qoftë natryrore qoftë nëpër katundet, po ashtu edhe brenda qytetit të Preshevës.
Më herët autori ka bërë një monografi me fotografi dhe fjalë për Preshevën, në të cilën ka përfshirë të gjitha aspektet që e përthekojnë komunën tonë në të gjitha aspektet, e ky botim vie si rezultat i punës së palodhshme të autorit që t’i ofroj lexuesve, studiuesve të gjitha asetet turistike të komunës sonë e të cilat nuk janë edhe të pakëta, porse lexuesit dinë fort pak për këto bukuri natyrore turistike, me të cilat duhet të mburremi si një komunë e vogël që jemi, por me resurse turistike të mjaftueshme.
Për të përparuar turizmi i komunës sonë, lypet angazhim, punë e palodhur për t’u konkretizuar me rezultate pozitive, sepse thuhet se sa investon, në çfarëdo fushe të jetës kulturore në të gjitha aspektet, aq do të kesh, kulturë, turizëm dhe jeta shoqërore do të jetë më e kompletuar.
Autori i librit, Dr. Jahi Murati-Staneci, ka punuar me përkushtim sa i përket përgatitjes për botim të këtij libri, i cili do të jetë si një udhërrëfyes për të gjithë ata që duan të dinë dhe ta njohin më tepër Preshevën në aspektin e turizmit të të gjitha segmenteve.
E veçantja e gjithë kësaj është se çdo vizitorë qoftë vendor apo i huaj përmes këtij botimi do të lidhet drejtpërdrejt si teorikisht po ashtu edhe praktikisht me të gjitha të mirat e turizmit të përgjithshëm të komunës sonë, duke e përfshirë edhe aspektin gjeografik, do të mësoj shumë më shumë se që ka pasur njohuri për Preshevën dhe të mirat turistike që ka.
Ky libër është ilustruar me 41 fotografi kolor, të gjitha të autorit, të cilat i ka shkrepur nëpër vendet kyçe, dhe si i tillë ky botim ka vlerë të madhe kulturore e shkencore, sepse brenda librit janë shënimet e thukëta që nga A-ja e rregullimit shkencoro-artistik deri te Zh-ja, pra është një libër i kompletuar, gjë që Preshevës i ka munguar deri më tani, e që tani për fatin tonë më të mirë, falë punës së Dr. Jahi Muratit-Staneci tani e kemi në bibliotekat tona dhe rajonale…
Bilall Maliqi, shkrimtar
No Comment