Në pamundësi të mbajtjes së mbledhjeve në kushte normale, në kohën e pandemisë së COVID 19, Partia Demokratike Shqiptare sot ka mbajtur një mbledhje të Kryesisë së saj dhe grupit të këshilltarëve, ku në fund doli me një informatë.
Postimi e plotë në vazhdim.
INFORMATË Kryesia e Partisë Demokratike Shqiptare në mbledhjen e saj të mbajtur sot, online në internet përmes platformës “meet google”, shqyrtoi situatën e përgjithshme në Luginë të Preshevës e me theks të veçantë në Komunën Preshevë. Pas diskutimeve të shumta Kryesia e PDSH-së konstatoi: Nga shpallja e gjendjes së jashtëzakonshme në Serbi, më datë 15 mars 2020, për shkak të Pandemisë Covid-19 dhe masave të ndërmarra nga Qeveria e Serbisë, shqiptarët e Luginës së Preshevës i ka prekur në të gjitha segmentet e jetës shoqërore edhe ashtu të brishta ndër vite si pasojë e diskriminimit shtetëror serb. Ky diskriminim duket drejtpërdrejt në organizimin e mësimit në distancë, ku për mësimdhënie dhe mësimnxënie në gjuhën shqipe, nga Ministria e arsimit në Beograd nuk u ofruan kushte të barabarta për të gjithë nxënësit, pavarësisht çfarë gjuhe flasin, për organizimin e mësimit në distancë. Nga masat e ndërmarra nga Qeveria e Serbisë, sektori ekonomik privat, bujqësia, blegtoria, veprimtaritë shërbyese dhe tregtare por edhe bizneset tjera janë goditur jashtëzakonisht, pothuajse gjer në paralizim, e në të njejtën kohë nuk iu është ofruar asnjë lloj shërbimi dhe ndihme deri më tani. Si rezultat i kësaj, përveç dëmeve që iu janë shkaktuar kompanive, ndërmarrësve, bizneseve të vogla e familjare, numër i madh i punëtorëve dhe të angazhuarve nëpër këto veprimtari, kanë mbetur pa të ardhura personale e me këtë pa të hyra familjare mujore. Numër i madh i qytetarëve, rreth 2000 prej tyre, për 28 ditë rresht janë detyruar të vetizolohen, sipas urdhëresës nga Ministria e punëve të brendshme, pa pasur shenja infektimi, vetëm e vetëm pse një ditë para shpalljes së gjendjes së jashtëzakonshme kanë kaluar kufirin në drejtim të Maqedonisë së Veriut apo Republikës së Kosovës, gjithashtu pa iu ofruar shërbime dhe asnjëlloj ndihme për nevojat familjare. Pushteti Lokal në Preshevë gjatë gjithë kësaj kohe, pothuajse ka qenë i ngjashëm me atë të Beogradit, thjesht nuk ka ndërmarrë asnjë hap përveç zbatimit të vendimeve të Qeverisë së Serbisë për masat kufizuese, duke mbështetur në heshtje diskriminimin shtetëror të Serbisë. Kuvendi Komunal i Preshevës ka hyrë në muajin e tretë që nuk ka mbajtur asnjë seancë, që është e domosdoshme për të sjellur vendime për të tejkaluar këtë gjendje dhe pasojat e saj. Nga data 24 mars komunës së Preshevës i është zhdukur një qytetar, përkatësisht kontabilist në institucionin e Pushtetit Lokal z. Besnik Osmani punëtor i bibliotekës “Mehmet Jusufi”, për fatin e të cilit nuk ka ende asnjë informacion dhe as angazhim qoftë edhe më i vogël nga Pushteti Lokal e mos të flasim për sjelljen e Pushtetit Qendror, i cili nuk merret me gjetjen e gjurmëve të qytetarëve shqiptar por shlyerjen e tyre. Bazuar nga kjo gjendje e rëndë ekonomike e sociale në të cilën ndodhemi, Partia Demokratike Shqiptare e sheh të domosdoshme organizmin e një seance të Kuvendit Komunal me qëllim të marrjes së masave të drejtuara në parandalimin e përhapjes së sëmundjes infektive Covid 19 dhe sjelljen e një programi socio-ekonomik, në mënyrë që të ruhen resurset tona njerëzore dhe këto potenciale ekonomike të pakta që i kemi. Në Preshevë, 16 prill 2020
Shërbimi për informim i PDSH-së
No Comment