“Zgjidhja e shumë problemeve varet drejtpërdrejtë nga raportet mes Kosovës dhe Serbisë, prandaj, nisja e dialogut mes dy shteteve është pritshmëria më e madhe në vitin 2020” thotë kryetari i Partisë për Veprim Demokratik (PVD) dhe kryetari i Komunës së Bujanocit, Shaip Kamberi.
Në një intervistë ekskluzive për Nacionali.info, Kamberi ka folur edhe për pozitën e shqiptarëve në Luginë të Preshevës, për mundësinë e një liste të përbashkët të partive politike shqiptare për zgjedhjet parlamentare si të “mundshme dhe të nevojshme”. Gjithashtu, është shprehur për funksionimin e “vështirësitë” të komunës së Bujanocit. Për “kryetarin e ri” të komunës e “kapacitetet adekuate”. Viti 2020 viti i “dialogut”.
Nacionali.info: Si e vlerësoni pozitën shqiptarëve në Luginë të Preshevës?
Shaip Kamberi: Edhe viti që po e lëmë pas nuk shënon ndonjë progres në drejtim të përmirësimit të të drejtave kolektive të shqiptarëve. Shumë çështje problematike, njohja e diplomave; me problemet tjera të arsimit fillor dhe të mesëm, nënpërfaqësimi në institucione publike dhe zhvillimi ekonomik janë tre çështjet që e rëndojnë më së shumti situatën e shqiptarëve. Krahas këtyre problematikave çështja e gjyqësorit dhe përfaqësimi proporcional në këto institucione, mos hapja e gjykatës themelore në Preshevë janë tema për të cilat nuk u shënua progres as në vitin që po shkon.
Nacionali.info: Cilat janë pritshmërit Tuaja për vitin e ardhshëm – 2020-të, shqiptarët e Luginës së Preshevës a do të jenë në të njëjtën pozitë?
Shaip Kamberi: Është shumë e qartë se zgjidhja e shumë probleme të përmendura varet drejtpërdrejtë nga raportet mes Kosovës dhe Serbisë, prandaj, nisja e dialogut mes dy shteteve është pritshmëria më e madhe në vitin 2020. Ky dialog, jo vetëm që duhet të ndërtojë stabilitet në mes dy shteteve, por edhe duhet të japë zgjidhje edhe për gjendjen e shqiptarëve në Luginë të Preshevës.
Nacionali.info: Si e vlerësoni krijimin e një liste të përbashkët të shqiptarëve për zgjedhjet parlamentare dhe cilat janë mundësitë?
Shaip Kamberi: Ideja e një liste të përbashkët të partive shqiptare nuk është ndonjë risi e veçantë. Jo vetëm si ide, por, edhe praktikisht ka funksionuar në zgjedhjet e vitit 2007 e 2008 nën emërtimin “Koalicioni i shqiptarëve të Luginës së Preshevës”. Më vonë, me prej 2012 ajo u shua. Tashmë ekziston një iniciativë konkrete e nisur nga Tirana për këtë. PVD e konsideron si të mundshme dhe nevojshme unifikimin nën një listë, nëse vendoset që të merret pjesë në zgjedhjet parlamentare.
Nacionali.info: Si e vlerësoni funksionimin e komunës së Bujanocit për vitin 2019-të?
Shaip Kamberi: Pavarësisht vështirësive që na u paraqitën në pjesën e dytë të këtij viti, me ekzekutimin e dhunshëm të disa vendimeve gjyqësore në vlerë prej 27 milion dinarë, pavarësisht se nuk do të kemi të drejtë të inkasojmë taksën ndaj elektrodistribucionit në vlerë prej 68 milion dinarë, Komuna e Bujanocit, përsëri ka arritur të realizojë obligimet e veta që dalin nga Buxheti i vitit 2019. Disa projekte kapitale, të cilat për shkak të këtyre vështirësive nuk janë arritur të kryhen janë bartur për realizim në vitin 2020. Megjithatë, obligimet tona ndaj shfrytëzuesve tjerë të buxhetit janë kryer me rregull.
Nacionali.info: A jeni të përgatitur për zgjedhjet komunale që do të mbahen në mars?
Shaip Kamberi: Meqë zgjedhjet e reja janë zgjedhje të rregullta të cilat do të mbahen pas një cikli katër vjeçar, përgatitjet tona për mbajtjen e tyre janë duke u bërë në mënyrë normale dhe me aktivitete brenda subjektit tonë. Pak kohë më parë ne zgjodhëm kryesinë dhe kryetarin e ri të Degës së PVD-së në Bujanoc, në të ardhmen e afërt ne na pret angazhim në përcaktimin e programit të ri zgjedhor dhe kandidatit të ri për kryetar komune. Janë këto aktivitete për të cilat kërkohet angazhim i secilit anëtarë tonit. Shpresoj dhe besoj se ne kemi kapacitete adekuate për të realizuar objektivat që i vëmë obligim organizimit tonë.
Nacionali.info: Si e shihni funksionimin e komunës për vitin 2020-të?
Shaip Kamberi: Viti 2020 është vit zgjedhor, i cili varësisht nga përcaktimi i afatit të zgjedhjeve mund të ndikojë edhe në punën e administratës dhe strukturës komunale. Pavarësisht kësaj, punët e përditshme do të vazhdojnë të kryhen sikurse zakonisht, ndërkohë që mendoj se edhe planifikimet pas zgjedhore do të jenë ndikuese edhe në punën e komunës.
Nacionali.info: Cili është mesazhi Juaj për vitin 2020-të?
Shaip Kamberi: Viti 2019 ishte një vit i pritjeve të mëdha, për shkak të krijimit të përshtypjes se dialogu Kosovë -Serbi do të jetë shumë ndikues edhe në Luginën e Preshevës. E thashë që në nivel lokal patëm disa vështirësi financiare, prandaj shpresoj dhe besoj se viti 2020 do të sjellë rezultate të shumëpritura në vitet e shkuara pikërisht duke u bazuar në pritjet që kemi në qeverinë e re të Kosovës dhe në nisjen e dialogut të Kosovës me Serbinë.
No Comment