T’I RESPEKTOJMË REKOMANDIMET E PERSONELIT MJEKËSOR…
Në këto ditë të gjendjes së jashtëzakonshme, dhe nevojës së shumë pacientëve për barna, farmacitë janë ndër bizneset më të rëndësishme, të cilat po punojnë sipas orarit të plotë.
Më poshtë nacionali.info ju sjellë intervistën e bërë me farmacistin e njohur, njëherësh edhe pronar i barnatores ”DIONPHARM” në Preshevë, Agron Mustafa.
Nacionali.info : Dihet se jemi në gjendje të jashtëzakonshme, barnatorja e juaj me çfarë orari punon?
Agron Mustafa: Barnatorja jonë ”DIONPHARM” ka ndërruar orarin e punës , për shkak të gjendjes së jashtëzakonshme . Orari u është përshtatur kërkesave të pacientëve, dhe ate në forma të ndryshme , duke filluar me orarin e rëndomt si dhe kontakti ynë përmes telefonit, emaileve dhe viberit.
Nacionali.info : A po keni barna të bollshme, sidomos për të sëmurit kronik?
Agron Mustafa: Pavarësisht vështirësive që i patëm në fillim të Pandemisë, sidomos në javën e parë , barnatorja jonë është e furnizuar mjaftueshëm me barna për të sëmurit kronik.
Nacionali.info : Si është furnizimi, a po ka mungesa të barnave?
Agron Mustafa: Siç e ceka më lart, java e parë e Pandemisë ishte më problematike, për furnizim, pastaj gjërat filluan të stabilizohen, edhe pse shpeshtësia e furnizimit nga furnitorët ka rënë, nëse para Pandemisë furnizoheshim çdo ditë nga një furnitor, tani furnizohemi një herë në javë.
Nacionali.info : Në barnatoren tuaj, a ka shtim të kërkesave për barna?
Agron Mustafa: Në fillim të Pandemisë , kërkesat nga ana e pacientëve ka qenë tepër e madhe, sidomos për sëmundjet kronike si dhe kërkesat për sanitet: dezinfektor, dorëza dhe për antiseptikë të ndryshëm , por edhe për antibiotikë dhe analgetikë.
Nacionali.info : Porosia e juaj për pacientët. Lidhur me virusin korona?
Agron Mustafa: Të jemi të kujdesshëm, të mos kemi panik. T’u pëmrbahemi rekomandimeve të personelit shëndetësor, të kemi kujdes në marrjen e informacionit, të mos i besohet gjithçkaje që flitet dhe që shkruhet në rrjetet sociale.
Njëherit si rezultat i masave të ndërmarra nga personeli i mantelbardhëve , statistikat e të infektuarve është duke rënë si numër, si dhe numri i pacientëve të identifikuar me COVID 19, janë në shërim e sipër.
Pra të respektojmë rekomandimet shëndetësore, që të gjithë së bashku të dalim me sa më pak pasoja.
/Nacionali/
No Comment