“PVD si partia më e madhe politike që organizon shqiptarët edhe në Bujanoc është e gatshme për zgjedhje në çdo kohë a moment”, thotë kryetari i Degës së Partisë për Veprim Demokratik në Bujanoc, mjeku i mirënjohur, Burhan Halili, në një intervistë për Nacionali.info.
Ai thekson sukseset e komunës së Bujanocit si anëtar i Këshillit Komunal, zgjedhjet e ardhshme lokale e jep mesazhin për vitin 2020.
Nacionali.info: Si e vlerësoni funksionimin e komunës së Bujanocit për vitin 2019-të?
Burhan Halili: Komuna e Bujanocit edhe për kundër shumë sfidave që ka pasur para vete, me sukses po e përmbyllë këtë vit kalendarik. Me sukses po përmbyllen gati të gjitha projektet rreth rregullimit të infrastrukturës nëpër të gjitha vendbanimet e komunës të parapara për këtë vit. Gjithashtu, me sukses është realizuar projekti për subvencionimin dhe inkurajimin e bizneseve të mesme dhe të vogla si dhe mbështetja e fuqishme e buqëve te komunës sonë. Po ashtu jemi në përfundim e sipër rreth angazhimit të një numri të madh të të rinjve dhe të rejave (mbi 150) për mbajtjen e praktikës së aftësimit profesionalë nëpër organizata të ndryshme publike si domosdoshmëri për të u kompletuar profesionalisht e për të qenë konkurrent para institucioneve dhe tregut. Udhëheqja e komunës së Bujanocit edhe këtë vit suksesshëm ka adresuar me seriozitet të gjitha çështjet, ka vendosur standarde të reja qeverisëse e çka është më rëndësishme është kthyer kah qytetari dhe ka trajtuar kategoritë më të neglizhuar të shoqërisë.
Nacionali.info: A jeni të përgatitur për zgjedhjet komunale që do të mbahen në mars?
Burhan Halili: Edhe pse ende nuk ka një date zyrtare rreth mbajtjes se zgjedhjeve komunale për vitin 2020, PVD si partia më e madhe politike që organizon shqiptarët edhe në Bujanoc është e gatshme për zgjedhje në çdo kohë a moment. Si subjekt politik serioz vazhdimisht jemi në komunikim me strukturat dhe terrenin si dhe mbanë takime të rregullta me to me ç ‘rast shqyrton të gjitha çështjet e çdo vendbanimi. Qytetarët nuk janë të interesuar për eksperimente e aq më pak për të rikthyer të kaluarën. Besoj qe ne momentin kur edhe zyrtarisht të shpallet data e mbajtjes se zgjedhjeve, PVD ashtu siç është e përgatitur edhe do ti fitoj dhe rikonfirmoj besëlidhjen me çdo shqiptar e përkushtimin për t’i shërbyer.
Nacionali.info: Si e shihni funksionimin e komunës për vitin 2020-të?
Burhan Halili: Besoj që edhe në vitin 2020 Komuna e Bujanocit do të vazhdojë ashtu sikurse edhe deri më tani të jetë në funksion të të gjithë qytetarëve. Do të plotësohet edhe me programe të reja inovative. Do të shtojë energjinë edhe më fuqishëm në projektet dhe programet e nisura.
Nacionali.info: Cili është mesazhi Juaj për vitin 2020-të?
Burhan Halili: Dëshirojë qe viti 2020 te sjellë shëndet, paqe dhe lumturi për të gjithë qytetarët e Komunës se Bujanocit.
/Nacionali/
No Comment