Nga zgjedhjet e 21 qershorit që ishin zgjedhje të rregullta, të gjitha partitë politike dolën në zgjedhje, secila për t’i fituar zgjedhjet, por partia e parë me më shumë vota doli PD e Nagip Arifit, e cila nga zgjedhjet fitoi 10 ulëse në Parlamentin Komunal të Bujanocit e pasuar nga SNS po ashtu me 10 këshilltarë, por PD kishte diku mbi 80 vota më tepër se SNS, për të vazhduar me PVD e Shaip Kamberit me tetë këshilltarë, mandej LPD e Shqiprim Musliut me katër këshilltarë, APN e Arbër Pajazitit me 3 këshilltarë dhe UDSH me 1 këshilltar dhe tjerat mandate partitë tjera serbe dhe rome.
KOALICIONET:
Pas zgjedhjeve, PD e Negip Arifit, filloi bisedimet për një koalicion gjithpërfshirës mbarë shqiptar, duke biseduar me kryetarët e partive shqiptare pjesëmarrëse në zgjedhje, madje një takim e kishte edhe me kryetarin e degës së SNS për Bujanoc, Nenad Mitroviq.
Pas shumë peripecive dhe me ndihmën e Ministrit të Punëve të Jashtme të Shqipërisë, z. Gent Cakaj, u arrit koalicioni i përfolur dhe i shumëpritur i shumicës shqiptare me 26 këshilltarë shqiptarë, gjë që kjo ishte një ditë historike për shqiptarët e kësaj komune. Hera e parë ishte kur nuk varen më nga votat e këshilltarëve serbë, por vetë vendosin për fatin e komunës dhe të qytetarëve të saj pa dallim feje dhe etniteti.
KONSTITUIMI I KUVENDIT:
Dje ishte një ditë e madhe për Bujanocin, sepse po konstituohet Kuvendi komunal, po zgjidhen të deleguarit e popullit, po e japin betimin këshilltarët e Kuvendit të ardhshëm komunal të Bujanocit, po jep betimin kryetari i ri, kryetari i Kuvendit, zv. kryetari i kuvendit dhe Këshilli komunal.
Kuvendi i ardhshëm komunal i komunës së Bujanocit ka këtë përbërje:
Kryetar i Kuvendit, Enver Ramadani (PVD); Zv/kryetar i Kuvendit, Isuf Ibrahimi (PD); Sekretare e Kuvendit, Nermine Aliu-Ademi (PVD); Kryetar i Komunës Nagip Arifi (PD) Zv/kryetar i komunës Shqiprim Musliu (LPD).
Këshilli komunal : Izeir Fejzullahu, Jakup Xhelili, Luan Sadiku, Resmije Ramadani, Bunjamin Avdiu, Amet Mustafa (edhe 1 anëtar nga LPD pritet të propozohet nga partia në mbledhjen e ardheshme).
ZOTIMET:
Të gjithë të zgjedhurit e parafrazuar para sekretarës së Kuvendit dhe para popullatës e dhanë betimin solemn, se do të punojnë në bazë të statutit dhe ligjeve të komunës dhe në të mirë të gjithë popullatës së komunës, pa dallim feje dhe etniteti.
Në fund, kryetari i deritanishëm z. Shaip Kamberi foli për situatën politike, në theks të veçantë për marrëdhëniet dhe bisedimet Kosovë- Serbi dhe e uroi kryetarin e ri dhe përbërjen e kabinetit dhe të kuvendit për mandatin e ri katër vjeçar.
Edhe kryetari i posazgjedhur Dr. Nagip Arifi, pasi i falënderoi të gjithë përkrahësit dhe simpatizantët e PD-së, u zotua se do të punojë në të mirë të komunës, për t’i çuar proceset përpara.
Vlen të theksohet se opozita serbe, së bashku me dy këshilltarët romë e braktisën seancën në shenjë revolte dhe pakënaqësie…!
/Nacionali/
No Comment