Kryetari i KKSH, Mustafa letër Ambasadorit të USA rreth njohjes së diplomave dhe pasivizimit!

Kryetari i Këshillit Kombëtar Shqiptar, Ragmi Mustafa përmes një letre të dërguar Ambasadorit të Shteteve të Bashkuara të Amerikës, z. Anthony F Godfrey ka shprehur gatishmërinë e këtij institucioni për jetësimin e Marrëveshjes së Washingtonit rreth Pikës 6 dhe 12 të kësaj marrëveshjeje, që kanë të bëjnë me njohjen e diplomave reciproke si dhe te shpërngulurit.

Ky është postimi origjinal i tij

KKSH NË SHËRBIM TË JETËSIMIT TË MARRËVESHJES SË WASHINGTONIT, SI NJOHJA E DIPLOMAVE DHE ÇËSHTJES SË TË PAGJETURVE DHE TË ZHVENDOSURVE

Dje përmes një shkrese Ambasadorit amerikan në Beograd, z.Anthony F.Godfrey, shpreha interesimin dhe gatishmërinë e Këshillit Kombëtar Shqiptar për të kontribuar në jetësimin e çështjeve shumë të rëndësishme për Luginën e Preshevës nga “Marrëveshja e Washingtonit” të 4 shtatorit.

Siç dihet, pika 6 e kësaj marrëveshje nënvizon se: “Të dy palët do të njohin reciprokisht diplomat dhe certifikatat profesionale” dhe pika 12: “Të dy palët zotohen të shpejtojnë për të gjetur dhe identifikuar mbetjet e personave të zhdukur. Të dy palët angazhohen të identifikojnë dhe zbatojnë zgjidhje afatgjata, të qëndrueshme për refugjatët dhe personat e zhvendosur. Të dy palët angazhohen për të identifikuar një pikë kontakti, për të udhëhequr këto përpjekje brenda ministrive të tyre përkatëse të qeverive dhe për të koordinuar midis Beogradit dhe Prishtinës, dhe do të sigurojnë një azhurnim vjetor mbi numrin e çështjeve të zgjidhura dhe në pritje “.

Këto dy pika nënkuptojnë njohjen e diplomave të Kosovës në Serbi, si një problem jetik për shumë shqiptarë të Luginës së Preshevës të cilët janë diplomuar në Kosovë; si dhe zgjidhjen e fatit të të pagjeturve nga Lugina e Preshevës dhe të shqiptarëve të zhvendosur e dëbuar nga Lugina e Preshevës më 1999.

Për më tepër, në vitet e fundit, pasivizimi i vendbanimeve (një numër i madh i shqiptarëve nga Lugina e Preshevës po i pasivizojnë vendbanimet, gjë që ndodh edhe në ditët e sotme) e bëri situatën edhe më vështirë.

Këshilli Kombëtar Shqiptar është i përkushtuar për të kontribuar në zbatimin e këtyre çështjeve të dakorduara midis palëve nën garancinë e Presidentit të SHBA, z.Donald Trump.

/Nacionali /