“Jehu i fjalës” titullohet libri përmbledhës me vështrime kritike i miqve krijues dhe i kritikëve letrarë, gati për të gjitha veprat e shkrimtarit Hysen Këqiku, mbledhur dhe sistemuar nga autori i librave.
Ky libër përmbledhës me gjithë mendimet kritike, përsiatjet, esetë dhe mbresat e autorëve, të cilët i kanë qitë në spikamë vlerat ideo artistike dhe iedo-estetike të librave të Hysen Këqikut , ngërthen në veti gjithë ato mendime, qëmtime objektive dhënë për këto libra të shkrimtarit Këqiku, në të cilat secili mendimtar ka shkrirë mendimin e tij lidhur me veprat e lexuara.
S’do mend se shkrimtari Këqiku, tanimë është një penë e njohur gjithandej trojeve shqiptare, këtë e arsyetojnë në mënyrë të thukët trajtuesit e librave, të cilët nuk kanë dhënë mendime për “hatër” apo sikur miku për mikun, por ato mendime qëndrojnë brenda rreshtave të tyre vlerësues.
Në mesin e këtyre vlerësuesve ka kritikë me emër e nam në kritikën mbarëshqiptare, siç janë Prof. Dr. Faik Shkodra, Nexhat Rexha, Mehmetali Rexhepi Mexhid Mehmeti, Jonuz Fetahaj, Shefik Shkodra, dy kritikët e famshëm rumunë: Marius Chelaru dhe Monika Mureshan dhe disa kritikë dhe eseistë të tjerë, të cilët janë munduar të janë sa më korrekt në vlerësimet e tyre, gjë që në masë të madhe ia kanë arritur qëllimit.
Këto vlerësime sheshojnë vlera në secilin zhanër të letërsisë, siç ka shkruar edhe autori i librave dhe si të tilla japin një pasqyrë ngjarjesh poetike, prozaike dhe dramatike, të cilat e përthekojnë tërë krijimtarinë e gjithmbarshme të Hysenit.
Këto larushi mendimesh takohen në pikëtakimin e arsyeshëm e që është vlera artistike, figuracioni dhe shprehjet e mendimeve kritike lidhur me vlerat e botimeve të autorit.
Me këtë libër dhe me mendimet pozitive (me vërejtje shumë të imëta) shoqërohet komplet letërsia e shkrimtarit Këqiku, duke u servuar lexuesve tërë këtë minierë të mendimeve të autorëve kritik e të atyre që i kanë derdhur mbresat e tyre, qoftë edhe në mënyrë publicistiko-vështuese e kompletojnë këtë vepër me numrin një, për t’ia hapur udhën edhe të tjerëve që ta lexojnë letërsinë vijimtare të Këqikut e të dalin me mendimet e tyre vështruese dhe kritike, të cilat mandej do të futen edhe në botimin e dytë të po këtij formati, meqenëse shkrimtari H. Këqiku në dorëshkrim ka edhe një mori të veprave të zhanreve të ndryshme letrare dhe artistike, të cilat në një të ardhme të afërt presin dritën e gjelbërt të botimit.
Ky libër del si produkt i punës së palodhsme të shkrimtarit për të na servuar libra të zhanreve të ndryshme letrare dhe të atyre që i kanë lexuar dhe kanë dhënë mendim “matës” për vlerat e librave të tij.
Tani lexuesit dhe bibliotekat tona dhe ato rajonale tanimë e kanë të kompletuar krijimtarinë e gjithmbarshme letrare të shkrimtarit dhe vlerësimet e dhëna të njerëzve kompetentë lidhur me ato vlera të cilat duhet t’i kenë librat autorialë të autorit dhe me këtë të formësohet dhe të forcohet bindja se kemi të bëjmë me një shkritmar serioz dhe mjaft produktiv, siç është Hysen Këqiku…!
Bilall MALIQI, shkrimtar
No Comment