Në sallën e madhe të shtëpisë së kulturës “Abdulla Krashnica “ në Preshevë, në prani të një numri të artëdashësve, u organizua dita e bibliotekës “Mehmet Jusufi”.
Për historikun e bibliotekës, foli organizatori i bilbiotekës z. Hasan Hasani, i cili lexoi një historik të shkurtër të ekzistimit dhe të punës së këtij institucioni.
Në kuadër të këtij manifestimi u hap edhe ekspozita e piktores preshevare Luljeta Saqipi, e cila do të jetë e hapur edhe ditëve në vazhdim në holin e bibliotekës së qytetit.
Po ashtu pjesë e këtij evenimenti ishte edhe përurimi i librit i karakterit historiko-politik i autorit, mr. Reshat Neziri me titull” Presheva, historia-politike”.
Në mungesë të recensentit të librit, prof. Dr. Nazmi Maliqi, recensionin e lexoi organizatori Hasan Hasani, ndërsa për librin foli redaktori , shkrimtari Bilall Maliqi, i cili e çmoi lart punën shkencore të autorit të librit. Në mes tjerash redaktori Maliqi tha:
“Autori është një gjurmues i vërtetë dhe i rrallë, andaj këtë libër e ka rumbullakuar, duke ia dhënë shijen artistike dhe estetike dhe me këtë mund të themi lirisht se me këtë libër e ka fituar vulën e studiuesit të mirëfilltë.
Nga ky libër lexuesit, studiuesit e kësaj lëmie mund të nxjerrin ngjarje faktografike të ilustruara me një realitet të pakontestueshëm”.
Gjatë këtij Manifestimi u pensionua edhe punëtori Felah Kurtishi, të cilit drejtori i dhuroi mirënjohje për kontribut në punë dhe një orë dore.
Me mirënjohje u nderuan edhe Shoqata e Shkrimtarëve “Feniks” dhe Besa Asllani.
Pati edhe deklamim të një monologu nga Besa Asllani si dhe dy pika muzikore nga këngëtari Agim Kadriu.
/Nacionali/
No Comment