Doli nga shtypi libri me poezi dhe poemë me titull “Marsho vargu im” i poetit Avni Shaqiri, përgatitur për shtyp nga Shoqata e Shkrimtarëve “Feniks” (Preshevë, Bujanoc dhe Medvegjë), me shtëpinë botuese “Lena” Prishtinë, 2021.
Lidhur me vlerat e librit paraqitet me një pasthënie redaktori i librit Bilall Maliqi:
GJETJE INTERESANTE BRENDA VARGJEVE POETIKE…
Avni Shaqiri, tanimë një penë e njohur e kësaj Krahine, i cili shkruan poezi e poema për të rritur e për fëmijë, duke treguar një zell për të krijuar dhe vjershëruar për të dy ligjerimet poetike, tani vjen me një vëllim të ri poetik me titull “Marsho vargu im”, të cilën e ka ndarë në dy cikle poetike”/ Rrugë të mbarë vargu im/ dhe poema / Për ty/, në të cilat ka shkrirë ndjesitë poetike, që i “vlonin” brenda shpirtit të tij poetik.
Në ciklin e parë para nesh na del një botë frymëzimesh të autorit të përziera, pra aty ku e ka ngacmuar muza, aty ka krijuar poezi dhe ky cikël është me poezi mikste, te të cilat sheshohet në masë të madhe përditshmëria jonë si në aspektin ekonomik, kulturor e politik, me të cilat ndeshemi çdo ditë, por të shkruara me një gjuhë të kuptueshme për secilën shtresë të lexuesve, të cilat poezi kanë porositë e veta karshi veseve negative me të cilat është ngarkuar shoqëria jonë në aspekte përgjithësuese.
Poeti në ciklin e parë i shkruan poezi koronës, një virus vdekjeprurës, i cili mori jetë njerëzish, destabilizoi jetën, prishi rregullat e jetës dhe marrëdhënieve jetësore të rregullimit familjarë e miqësor në kulturën dhe traditën e shkëlqyer shqiptare, ekoniminë dhe gjithçka çrregulloi, prandaj autori i drejtohet me këto vargje:
Të urrejmë, ik sa më shpejtë
arma yte t’u bëftë bumerang
t’na shkaktosh plagë s’ke të drejtë
n’theqafje vafsh, të marrtë lumi Gang!
Përveç kësaj, poeti Shaqiri, shkroi vargje përkushtimore plisit, identifikuesit të kombit tonë, ku brenda saj ka figura stilistike që e bën të qëndrueshme poezinë. Po ashtu poezi përkushtimore i shkroi mësuesit, ideatorit të pajtimit të gjaqeve dhe ngatërresave Anton Çetës, ku brenda vargjeve hetohet figura e krahasimit dhe e epitetit, por në anën tjetër, autori prapë kritikon përmes vargjeve poetike Evropën, e cila ka qenë gjithmonë njerkë për shqiptarët, duke i shkelur pamëshirshëm me anë të politikës nënçmuese. Këto kritika, mbase të drejta të poetit janë manifestuar edhe në poezi të tjera të librave paraprakë (Evropë zeza me njolla të bardha), ku poeti, Shaqiri me anë të vargjeve poetike e demaskon politikën çoroditëse të kontinentit më të vjetër. Për më shumë, poeti kështu i drejtohet Evropës:
Hileqarja ti, Evropë ku je
vallë, ku m’i ke ata sy
kurrë në jetë s’pate nge
zullumqarët t’i vësh në dry
Kjo u pa edhe me burgosjen e ish-themeluesve të UÇK-së, padrejtësisht, dhe poeti shprehë revoltë e paknaqësi, prandaj në vazhdim të poezisë, kritikon edhe ata që iu gëzuan apo i gëzohen prangosjes së atyre që na e sollën lirinë.
Më tej në lexim të poezive të ciklit të parë, hasim në poezi të tjera, në të cilat, autori ka shkarkuar gjithë atë “ mllef” karshi të bëmave të protagonistëve që fshihen brenda vargjeve poetike, të cilat janë reale dhe objektive, të tilla poezi lexuesi i gjenë në ciklin e parë poetik.
Poeti, Avni Shaqiri shkruan vargje të rimuara, pra nuk mund assesi të lirohet nga rima, edhe pse rima në një masë të madhe ia kufizon mendimin poetit, sepse ajo duhet të jetë e fuqishme për t’u rumbullaksuar një poezi edhe e rimuar edhe e rregulluar mirë artistikisht.
Lexuesi te cikli i parë poetik do të lexojë tërë ndjeshmërinë e poetit e disa nga lexuesit bëhen pjesë e vargjeve poetike, sidomos atyre që në një mënyrë apo tjetër mveshen me kuptimshmërinë e poezive.
Poemën /Për ty/, autori ua ka kushtuar femrave shqiptare nënave, motrave, të dashurave e bashkëshorteve tona, të cilat janë më të merituarat që i kemi tejkaluar të gjitha sfidat gjatë historisë.
Së lexuari të poemës krijohet përshtypja se je duke e lexuar një vëllim tjetër poetik, sepse deri te poema, lexuesi është ndeshur me ngjarje të ndryshme poetike, të cilat autori ka shkruar për përmirësim dhe ndërgjegjësim të shoqërisë sonë e sidomos atyre që me veprimet e tyre fshihen brenda vargjeve poetike, ndërsa te poema, lexuesi ndien pushim, relaksim dhe dëshirë për lexim dhe rilexim të poemës.
Është një gjetje interesante e poetit dhe një poemë e veçantë për autorin, sepse ai femrën e bën: ajër, bukë, ujë, dritë, pluhur, shi, borë, vesë, rreze, erë, urë, gurë, hije, mjaltë, aromë, furtunë, fushë, mal, zjarr, det, valë, kala, beden, livadh, mriz, e çka e çka nuk e bënë tjetër.
Pra, së filluari të leximit të poemës (e cila ka ngritje më të lartë artistike në krahasim me ciklin e parë poetik), para nesh na del një organizim i mirë poetik i secilit kapitull (27 sosh) me epitetet e ngarkuara në kapitujt e lartshënuar, ku në fillim të secilit kapitull bën krahasim të arsyeshëm të botës femërore me titujt e pjesëve të ndara, të cilat janë interesante si nga gjetja motivuese, po ashtu edhe nga ndërtimi i vargut, sepse poema don kondicon poetik, nuk don përsëritje të panevojshme apo ngarkesë të fjalëve që e rëndojnë vargun e më pas e lëndojnë edhe poemën.
Pra, është një poemë që ia vlen të lexohet, pse jo edhe të recitohet, sepse thamë më lart se poeti Avni Shaqiri shkruan poezi me rimë dhe me muzikalitet, prandaj si e tillë poema ka vlerën e saj solide.
Marrë në përgjithësi libri me poezi dhe me poemën brenda saj, ka vlerën e vet, sepse lexuesi gjenë brenda tekstit poetik shumëçka interesante, sidomos te poema, dhe si i tillë, libri mund të botohet dhe t’u servohet lexuesve dhe bibliotekave tona dhe rajonale…
/Nacionali/
No Comment