Me filmin e metrazhit të shkurt “Shok” të nominuar për “Oscar”, sot u përmbyll edicioni i II-të “Java e filmit të Kosovës” të organizuar nga Këshilli Kombëtar Shqiptar (KKSH) në bashkëpunim me Qendrën Kinematografike të Kosovës (QKK) dhe Shtëpinë e Kulturës në Bujanoc.
Filmat më të mirë kosovar që karakterizuan këtë edicion u mirëpritën nga dashamirësit e filmit për 5 ditë me radhë. Shumica prej këtyre filmave ishin fitues të çmimeve ndërkombëtare, e në mesin e tyre edhe të nominuar për çmimet më prestigjioze kinematografike botërore.
Kryetari i KKSH, Ragmi Mustafa, shprehu “edhe njëherë falënderimet me mirënjohje të thellë për drejtorin e QKK-së Arben Zharku, e koordinatorin për kulturë pranë kabinetit të Kryetarit të Komunës së Bujanocit, Nagip Tashin, si dhe gjithë të tjerëve që mundësuan këtë edicion” përmes llogarisë në facebook.
Gjithashtu, në një prononcim për Nacionali.info koordinatori i këtij eveniment, Nagip Tashi, falënderoi të gjithë ata që ishin përcjellës të rregullt të “Javës së Filmit të Kosovës”, Qendrën Kinematografike të Kosovës, Këshillin Kombëtar Shqiptar dhe Shtëpinë e Kulturës në Bujanoc për realizimin e edicionit të II-të të kësaj ngjarje.
Nagip Tashi u shpreh i bindur që “gjatë vitit 2020 do vazhdoj edicioni i III-të , ndoshta me format edhe më të gjerë”.
Vlen të theksohet se “Java e filmit të Kosovës” ishte produkt i bashkëpunimit të institucioneve të Republikës së Kosovës gjegjësisht QKK-së dhe institucioneve të Luginës si KKSH e Shtëpia e Kulturës Bujanoc.
/Nacionali/
No Comment