Satiristi i njohur nga Lugina e Preshevës dhe më gjerë, Sevdail Hyseni, botoi librin e tij të dytë me poezi stirike e humoristike me titull “Ëndrra në diell”, botues, shb. “Lena “Prishtinë 2021.
Për librin në fjalë kanë dhënë mendimet e tyre redaktori i librit dhe dy recensentët, njëri nga ata nuk është më në mesin tonë, sepse ky libër është shkruar, që kur ishte gjallë shkrimtari i njohur për fëmijë Rifat Kukaj dhe tani pas kaq kohe, autori e fut në botim.
***
Poezitë e përmbledhura në këtë vëllim me titullin „Ëndrra në diell“, po ashtu temë trajtimi kanë ngacmimin e dukurive shoqërore dhe veseve të njerëzve, që me teprimet në raportet shoqërore bëhen objekt humori e satire.
Mjeshtëria e Sevdail Hysenit, qëndron në gdhendjen e vargut, në thënien e mendimit po përmes këtij vargu me një gjuhë sa satirike, sa humoristike e herë – herë sarkastike me një qartësi fine. Por, në poezitë e tij, autori spikat një varg të shkrirë, të qartë dhe me porosi konkrete.
Faruk Tasholli
Nëpër këto vargje shtrihen përpëlitjet e njerëzve tanë (natyrisht një numër i caktuar) që me ngulm duan të hidhen në vallen e kohës. Të tillët, në mënyrë të pavetëdijshme e karikojnë veten. Këto kreatura duke menduar se po i këndojnë ninulla demokracisë, duke “përkundur” djepin e saj, meqë nuk janë të shkathët, foshnjës së njomë e të brishtë ia përplasin kokën dhe ia sjellin marramenthin.
Këto sajime, të botuara edhe më parë nëpër faqet e humorit të gazetave dhe periodikut, janë njëherësh edhe një kronologji e hidhur e ngjarjeve që na përcjellin, dhe nuk na lënë të hapërojmë drejt.
Rifat Kukaj
Sevdail Hyseni, njihet në opinion një satirik i mirënjohur shqiptar. Ai me satirat e tij shpreh ironinë e thellë, të metat, dobësitë e njerëzve, të cilat i përkasin përditshmërive tona në secilin rrafsh jetësor. Satiriku i njohur Hyseni, me mprehtësinë e tij prej një krijuesi sheshon, thumbon mjeshtërisht përmes vargjeve poetiko-satirike, të cilat kanë guxim, forcë shprehëse dhe si të tilla janë shumë koherente dhe funksionale për shumë kohë, ashtu siç janë edhe satirat nga libri i tij i parë “Kur të qeshë fati”.
Libri me satira “Ëndrra në diell”, ka ngritje artistike në krahasim me librin e parë, duke u nisur edhe nga gjetjet motivuese deri te realizimi artistik i poezive të tij…
Bilall Maliqi
Sevdail Hyseni ka të botuar edhe një libër me titull “Kur të qeshë fati”.
Po ashtu brenda librit, ai falënderon të gjithë donatorët nga Diaspora që mundësuan botimin e librit të tij…
/Nacionali/
No Comment