Huliganët e panjohur shkatërruan pikturën murale të pikturuar në murin e shkollës fillore “Naim Frashëri” në Bujanoc.
Murali, i cili u pikturua nga organizata “Beyond” në shenjë falënderimi për Shqipërinë dhe Kosovën për faktin se këto dy shtete ndihmuan që nxënësit shqiptarë të kenë libra shkollorë në gjuhën e tyre amtare për herë të parë në dy dekada, mbi të njëjtën është pikturuar me mbishkrimet “Kosova është Serbi”.
Në rrjetin social të facebook-ut reagoi njëri nga veprimtarët kulturor dhe njëri nga ata që pikturoi këtë mural shumë të bukur, artistic dhe mjaft domethënës, Nexhat Boriçi, shkruan:
“Ne pritëm që shumë portale shqiptare ta marrin lajmin por si për çudi e vetmja që e publikoj këtë lajm ishte Bujanovaçke në gjuhën sërbe( edhe pse ka disa kronika vetëm në gjuhën shqipe ). Menduam se i pëlqeu lajmi por si duket ju paska pengu simbolika e muralit, gjë që ne mendojmë se ka nxitur huliganë e fëlliqësira ta shkarravisin, sepse nuk ka shqipfolës që do ta kishte bërë këtë”.
E falemnderojmë Zotin që na dha shëndetin e vullnetin, e ky mural do të përmirësohet shumë shpejt.
Vlen të theksohet se për këtë huliganizën reagoi zv/ kryetari i komunës së Bujanocit, Shqiprim Musliu dhe kryetari i KKSH-së, Ragmi Mustafa…
Në shkrimin e Mustafës thuhet:
“Këshilli Kombëtar Shqiptar shpreh indinjatën dhe shqetësimin e tij lidhur me rritjen e shqiptarofobisë në Serbi.
Grafitet e fundit në shkollën fillore “Naim Frashëri” në Bujanoc, “Kosova është Serbi”, janë vetëm tregues të klimës dominuese shoqërore në Serbi kundër pakicave në përgjithësi dhe shqiptarëve në veçanti.
Do të ishte reduktim të trajtohen këto grafite si shprehje individuale e urrejtjes. Ato janë produkt i sistemit aktual në Serbi dhe pasojë e diskursit në rritje ksenofob kundër minoriteteve nga politikanët, mediat dhe ministra me ndikim publik në Serbi.
Këshilli Kombëtar Shqiptar fton organet përgjegjëse në Bujanoc që ta zbatojnë ligjin kundër përhapësve të gjuhës së urrejtjes.
Ndryshe nuk mund të presim reagime të institucioneve shtetërore kur edhe i propozuari për ministër të brendshëm z. Aleksandër Vulin nga mandatarja për postin e Kryeministres së Qeverisë së re të Serbisë, znj. Ana Bërnabiq, i cili krenohet me fyerjet publike ndaj pakicat kombëtare dhe që ushqen vazhdimisht diskurs ksenofob e shqiptarofob.”
Ndërsa në reagimin e z/v. kryetarit, Musliu, thuhet:
“Sot jemi informuar se një ngjarje dhe provokim i rëndë ka ndodhur me institucionet shkollore në Bujanoc, ku dikush ka dëmtuar muralin e krijuar nga një artist shqiptar nga Lugina e Preshevës.
Ky mural është krijuar për të falëmnderuar institucionet e Kosovës dhe Shqipërisë për mbështetjen që i kanë dhënë shkollave shqipe në Luginën e Preshevës për furnizimin me tekste mësimore në gjuhën shqipe.
Në cilësinë e nënkryetarit të Bujanocit, dënoj ashpër këtë akt të dëmtimit të muralit, që shpreh falëmnderime për ndihmën që iu është dhënë nxënësve shqiptarë.
Po ashtu, kërkoj që të hetohet nga organet e ndjekjes se kush janë dhunuesit e këtij murali, njëherit edhe provokues të situatës, e të cilët kanë provukuar rëndë shqiptarët e Luginës së Preshevës, duke prekur në institucione shkollore, çka është e pa pranueshme për ne”.
/Nacionali/
No Comment