Kryetari i Këshillit Kombëtar Shqiptar, Ragmi Mustafa përmes një njoftimi ka bërë të ditur se, edhe kësaj here, sot, kur ishte e caktuar data e përballjes së tij me Ministrin tanimë të Punëve të Brendshme, Aleksandar Vulin është shtyrë, për shkak se ky i fundit prap iu është shmangur Gjykatës së Lartë në Beograd.
Ai kësaj gjykate i ishte shmangur edhe në shtator të këtij viti.
Ky është postimi i tij :
MINISTRI “PATRIOT” I POLICISË QË I IK DREJTËSISË SË SERBISË PËR FYERJEN E SHQIPTARËVE
Ministri i ri i Punëve të Brendshme i Republikës së Serbisë, z.Aleksandër Vulin iku edhe sot nga drejtësia, për t’u përballur me padinë time ndaj tij, për qasje diskriminuese, fyese dhe nënçmuese ndaj shqiptarëve.
Aleksandër Vulini i cili krekoset në vazhdimësi si patriot i madh në mediat e Serbisë, edhe duke i fyer shqiptarët me termin pezhorativ “šiptari”, nuk e pati as sot guximin për t’u paraqitur në Gjykatën e Lartë në Beograd, duke u arsyetuar se nuk do të paraqitet pa praninë e avokatit, që sipas tij mund të jetë infektuar me Covid-19. Duke i ururar shëndet avokatit të tij, ftoj z.Vulin të paraqitet në Gjykatë dhe të mos frikësohet nga e vërteta.
Këshilli Kombëtar Shqiptar nuk do të ndalet së vepruari kundër institucionalizimit të gjuhës së urrejtjes dhe kriminalizimit të shqiptarëve, aq më pak nga ana e zyrtarëve shtetërorë.
Vlen të theksohet se data e ardhshme e ballafaqimit të kryetarit Mustafa dhe Ministrit Vulin është caktuar më 28 dhjetor 2020.
No Comment